БРИТАНИ ДАХЬ МОНГОЛЧУУДЫН ХОЛБОО ШАГНУУЛЛАА

ЮНЕСКО-ийн соёлын биет бус өвийн жагсаалтад бүртгэгдсэн “Монгол наадам”-ыг хилийн чанадад зохион байгуулж байгаагаар нь Монгол Улсын Гадаад харилцааны яам, Үндэсний их баяр наадмыг зохион байгуулах хороо хамтран гурав дахь жилдээ шалгарууллаа.

Эх орноо гадаадад сурталчлах, монгол соёл, уламжлалаа хадгалах, түгээн дэлгэрүүлэх үйлсэд үнэтэй хувь нэмэр оруулсаар байгаа Британи дахь Монголчуудын холбоо “Миний Монгол Наадам 2017” уралдаанд амжилттай оролцож хоёрдугаар байрт шалгаран Хүндэт өргөмжлөл , дарвөн сая төгрөгөөр шагнагдсан тухай сайхан мэдээг ГХЯ-ны Гадаад сурталчилгаа, соёлын харилцааны газраас хүлээн авлаа.

“Миний Монгол Наадам 2017” уралдаанд Герман дахь монголчуудын наадам шилдгээр, Британи дахь монголчуудын наадам хоёрдугаарт, Солонгос дахь монголуудын наадам гуравдугаарт тус тус шалгарчээ.

Энэ жилийн баяр наадмыг Лондонд амжилттай зохион байгуулсан Монголчуудын холбоо, зохион байгуулахад идэвх санаачилга гаргасан, хандив, дэмжлэг үзүүлсэн, сайн дурын багт ажилласан, урлаг соёл, нийтийн хоолоор үйлчилсэн болон наадамдаа оролцсон бүх хүмүүст талархал илэрхийлж, баяр хүргэн цаашид амжилтаа улам ахиулахын ерөөл өргөе.   

 

           Элчин сайдын Яам  

 

 

МОНГОЛЧУУД НААДМАА ӨРГӨН ДЭЛГЭР ТЭМДЭГЛЭВ

Тулгар төрийн 2226, Их Монгол Улсын 811, Ардын Хувьсгалын 96 жилийн ойг тохиолдуулан дэлхийн өнцөг булан бүрт суугаа Монголчууд маань үндэсний баяр наадмаа өргөн дэлгэр тэмдэглэн өнгөрүүллээ.

ИБУИНВУ-ын Лондон болон Манчестер хотуудад суугаа иргэдийн үүсгэл санаачилгын байгууллагууд тус тус зохион байгуулсан бөгөөд нийтдээ 400 гаруй хүмүүс нэг дор цугларлаа. Мөн Ирландад ажиллаж, амьдарч байгаа Монголчуудын наадам Дублин хотноо зохион байгуулагдаж 200 гаруй иргэд хүрэлцэн ирэв. Наадмуудын үеэр хүчит бөх, сурын харваа, шагайн харваа, хүүхдийн гүйлтийн уралдаанууд тус тус зохион байгуулагдаж, наадамчин олонд зориулсан үндэсний хоолны худалдаа явагдав.

Лондон хотноо болсон баяр наадмын арга хэмжээний үеэр Монгол хэлний сургалтын төвийн хүүхдүүд төрийн дууллаа дуулж сонирхуулсан бол үндэсний урлагийн Nomadic Tunes хамтлаг ая дуугаа өргөв. Дублин хотноо болсон наадмын үеэр босоо монгол бичгийг сурталчилж, цэвэр бичигтэн шалгаруулсан нь энэ жилийн наадмын содон үйл явдлаар нэрлэгдэв. Баяр наадмыг тохиолдуулан Лондон дахь Монгол хэлний багш Я.Болортуяаг Монгол Улсын Засгийн газрын шагнал – Боловсролын тэргүүний ажилтан цол тэмдгээр, Манчестер дахь шагайн харваач Г.Амаржаргаланг Монгол Улсын Засгийн газрын шагнал – Биеийн тамир, спортын тэргүүний ажилтан цол тэмдгээр, Дублинд дахь циркийн уран бүтээлч Б.Бурмааг Монгол Улсын Засгийн газрын шагнал – Соёлын тэргүүний ажилтан цол тэмдгээр тус тус шагнасныг Элчин сайдын яамны Элчин зөвлөх Б.Одонжил хүндэтгэлтэйгээр гардуулан өгөв.     


Монгол хэлний сургалтанд хамрагдсан хүүхдүүд Монгол Улсын Төрийн дууллыг дуулав.

Д.Цэрэнбат ахлагчтай Nomadic Tunes хамтлаг ая дуугаа өргөлөө.

Монгол Үндэсний Шагайн харвааны гол өрсөлдөөн Лондон болон Манчестер хотуудаас ирсэн багуудын хооронд өрнөв.

Өнө эртний түүхт Монгол Үндэсний сурын харвааг сурталчилан танилцуулав.

Ирландын наадмын үеэр босоо Монгол бичгийн цэвэр бичигтнийг шалгаруулав.

Ирландын наадмын үеэр үндэсний цагаан идээ, Монгол хоолны худалдаа гарав.

 

 

БРИТАНИД СУУГАА ИРГЭД, ИРГЭДИЙН ҮҮСГЭЛ САНААЧИЛГА БҮХИЙ ОЛОН НИЙТИЙН БАЙГУУЛЛАГУУДЫН СОНОРТ

 

 

 

 

 

 

 

 

 

 

Тулгар төрийн 2226, Их Монгол улсын 811, Ардын хувьсгалын 96 жилийн ой, Үндэсний их баяр наадмыг Лондон хотноо хэрхэн тэмдэглэн өнгөрүүлэх талаар нээлттэй ярилцах тул та бүхнийг өргөнөөр оролцохыг урьж байна.

Энэхүү уулзалтаар дараах асуудлуудыг ярилцана. Үүнд:

  • Наадмын бэлтгэл ажлыг зохион байгуулах бүрэлдэхүүн
  • Наадмын үндсэн хөтөлбөрийн агуулгыг ярилцах /бөх, уралдаан тэмцээнүүдийн төрөл/
  • Наамдын үеэр үйлчлэх худалдаа, үйлчилгээ
  • Наадмын спонсор, орлого, зардлуудын талаар
  • Цэвэрлэгээ, хог, паркын түрээс
  • Тайз, тохижилтын тухай
  • Бусад.

 Уулзалт 2017 оны 6 дугаар сарын 05-ны өдөр /Даваа гараг/-ийн 18 цагт Элчин сайдын яаманд болно. Хаяг: 8 Kensington court, W8 5DL

“МИНИЙ МОНГОЛ НААДАМ” УРАЛДААНТ ШАЛГАРУУЛАЛТЫН ЗААВАР

Нэг. Зорилго

ЮНЕСКО-ийн соёлын биет бус өвийн хүн төрөлхтний төлөөллийн жагсаалтад бүртгүүлсэн Монгол наадмыг сурталчлах,  хилийн чанадад ажиллаж, амьдарч буй Монгол иргэдийг дэмжих, тэдэнтэй хамтран ажиллах зорилгоор наадмыг амжилттай сайн зохион байгуулсан байгууллага, иргэдийг урамшуулан, алдаршуулах юм.

 Хоёр. Ерөнхий зохион байгуулагч

            Үндэсний их наадмыг зохион байгуулах комисс “МИНИЙ МОНГОЛ НААДАМ” уралдааны ялагчдыг шалгаруулна.

Гурав: Наадам зохион байгуулахад тавигдах шаардлага, шалгуур

“МИНИЙ МОНГОЛ НААДАМ” уралдаанд хилийн чанадад буй иргэдийн холбоо, нийгэмлэг, иргэд (цаашид оролцогч гэх) оролцоно. Оролцогч бүр комисст 2016 оны 7 дугаар сарын 1-ний дотор бүртгүүлсэн байна.

 

 “МИНИЙ МОНГОЛ НААДАМ” уралдааны ялагчийг шалгаруулж байр эзлүүлэхдээ дараах шалгуурыг баримтална. Үүнд:

  1. Нийт оролцогчдын тоо                                                     1-5 оноо
  2. Тухайн орны хэвлэл, мэдээллийн хэрэгсэлд нийтлэгдсэн, нэвтрүүлэгдсэн тоо                                  1-5 оноо
  3. Жиргээ (Твитер)-нд авсан Re-tweet тоо                            1-5 оноо
  4. Нүүр номны (Фэйсбүүк) Like-ын тоо                                 1-5 оноо
  5. Эрийн гурван наадмыг хамруулсан байдал                       1-5 оноо
  6. Монгол үндэсний өв, соёлыг сурталчилсан арга хэмжээ    1-5 оноо

 

Дөрөв. Тайлан ирүүлэх.

“МИНИЙ МОНГОЛ НААДАМ” зохион байгуулсан тайланг 2016 оны 07 дугаар сарын 20-ны дотор Монгол Улсын Гадаад хэргийн яамны dep08@mfa.gov.mn болон www.facebook.com/ Mongolian-Naadam-festival 2016 хаягаар цахим хэлбэрээр оруулах, бөгөөд тайланд дараах зүйл багтсан байна.

 

  • Энэхүү зааврын 3-р бүлгийн 1-6-д заасан мэдээлэлэл, баримт, видео, фото,
  • Зохион байгуулсан наадмын албан ёсны хөтөлбөр, зохион байгуулах комиссын бүрэлдэхүүн, холбоо барих хаяг,
  • Санхүүгийн тайлан.

 

Тав. Санхүүжилт.

“МИНИЙ МОНГОЛ НААДАМ”-ыг тухайн улс, хотод зохион байгуулах зардал, тайлан ирүүлэх зардлыг тухайн наадмыг зохион байгуулагч уралдаанд оролцогчид өөрсдөө хариуцна.

Зургаа. Шагнал урамшуулал.

“МИНИЙ МОНГОЛ НААДАМ”-ыг амжилттай зохион байгуулсан 3 оролцогчийг шалгаруулан Үндэсний их наадмыг зохион байгуулах комиссоос шагнал гардуулна. Шагналын сан нийт 10 сая төгрөг байна. Нэгдүгээр байранд орсон оролцогч 4.5 сая төгрөг, хоёрдугаар байранд орсон оролцогч 3,5 сая төгрөг, гуравдугаар байранд орсон оролцогч 2 сая төгрөг.

Бүртгүүлсэн бүх оролцогчдод дурсгалын гэрчилгээ гардуулна.

Байр эзэлсэн оролцогчдыг Монгол Улсын хэвлэл мэдээллээр сурталчлах ажлыг Гадаад хэргийн яам хариуцна.

МОНГОЛ УЛСЫН ГАДААД ХЭРГИЙН ЯАМ