Түлхүүр үг: featured

“HU” ХАМТЛАГИЙН БРИТАНИ ДАХЬ ТОГЛОЛТ ЭХЭЛЛЭЭ

Монголын хүннү рок “HU” хамтлаг 2019 оны 6 дугаар сарын 6-наас 7 дугаар сарын 6-ны өдрүүдэд Европын 23 хотоор хийх аялан тоглолтынхоо хүрээнд 6 дугаар сарын 11-ний өдрөөс эхлэн Британийн 6 хотод тоглох юм. Тус хамтлагийн Британид хийх аялан тоглолтын өмнө хамтлагийн бүрэлдэхүүнийг Монгол Улсаас ИБУИНХУ-д суугаа Элчин сайд Н.Тулга хүлээн авч уулзан Британийн хөгжмийн ертөнцийнхөнд мэдээлэл өгөх зорилгоор хэвлэлийн бага хурал, уулзалт ярилцлагыг тоглолтын ерөнхий зохион байгуулагч “Eleven Seven” студитэй хамтран ЭСЯ дээр зохион байгуулав. Уулзалт ярилцлагад “BBC”, “Daily Telegraph”, “Classic Rock”, “Freelance”, “Forbes”, “Меtro”, “Record Collector” зэрэг Британийн 20 гаруй хэвлэл мэдээллийн байгууллагын 40 гаруй төлөөлөгчид ирж, хамтлагийн уран бүтээл, Монгол хөгжмийн гайхамшгийн талаар чөлөөт яриа өрнүүллээ.

 

 

“ОЮУНЛАГ ОРШИХУЙ” УУЛЗАЛТ ЯРИЛЦЛАГА БОЛОВ

Британи дахь Монголчуудын холбооны санаачилгаар анх зохион байгуулагдсан “Оюунлаг оршихуй” цувралын ээлжит уулзалт ярилцлага 2019 оны 6 дугаар сарын 02-ны өдөр ЭСЯ дээр зохион байгуулагдав. Энэ удаагийн уулзалт ярилцлагад Манба дацан хийдийн хамба лам Д.Нацагдорж оролцож, Монголын уламжлалт анагаах ухаан, эмчилгээний талаар яриа хийв. Уулзалтад Британид оршин суугаа 40 орчим монгол иргэд оролцож, манай уламжлалт анагаах ухаан, эмчилгээний талаар сонирхсон асуултдаа хариулт авлаа.

БРИТАНИД ОРШИН СУУГАА ЭХЧҮҮДЭД “АЛДАРТ ЭХ”-ИЙН ОДОНГ ГАРДУУЛАН ӨГӨВ

Монгол Улсын Ерөнхийлөгчийн 2019 оны 5 дугаар сарын 23-ны өдрийн 101 дүгээр зарлигаар “Алдарт эх”-ийн II одонгоор шагнагдсан Британид оршин суугаа иргэн Цэцгээ овогтой Сарантуяа, Сүхээ овогтой Солонго, Лхагва овогтой Цэцэгсайхан, Сосорбурам овогтой Дуламдорж нарыг Элчин сайд Н.Тулга 2019 оны 6 дугаар сарын 01-ний өдөр ЭСЯ дээр хүлээн авч, одонг гардуулан өгч, баяр хүргэв.

“THE MEDICINE BUDDHA” КИНОНЫ НЭЭЛТ ЛОНДОН ХОТНОО ЗОХИОН БАЙГУУЛАГДАВ

Монгол Улсын гавьяат эмч, хамба лам Д.Нацагдоржийн амьдрал, Монголын уламжлалт анагаах ухааны өв уламжлал, хөгжлийг харуулсан Британийн найруулагч Бенжамин Жонсын бүтээл “The Medicine Buddha” баримтат киноны Британи дахь нээлтийг 2019 оны 5 дугаар сарын 31-ний өдөр Лондон хотын “Regent” кино театрт зохион байгуулав.

 

Хамба лам Д.Нацагдорж киноны нээлтэд Монголоос тусгайлан хүрэлцэн ирж оролцсон бөгөөд тэрээр киног сонирхон үзсэн Британийн 200 орчим хүмүүстэй киноны төгсгөлд Монголын уламжлалт анагаах ухаан, түүний онцлогийн талаар чөлөөт яриа өрнүүлэв.

 

 

 

ЭЛЧИН САЙД Н.ТУЛГА “EMERGING EUROPE & CENTRAL ASIA” ХУРАЛД ОРОЛЦОВ

Элчин сайд Н.Тулга энэ оны 4 дүгээр сарын 17-ны өдөр Лондон хотноо зохион байгуулагдсан “Emerging Europe & Central Asia” хурлын Монголын хэсэгт оролцож, Монгол Улсын эдийн засгийн өнөөгийн байдал, Эрдэнэс Тавантолгойн IPO-г олон улсын хөрөнгийн зах зээлд гаргах талаар мэдээлэл өгөв.

 

 

 

Мөн тэрээр хурлыг тохиолдуулан зохион байгуулсан Лондонгийн хөрөнгийн биржийн өдрийн арилжааг нээх ёслолын ажиллагаанд тус биржийн гүйцэтгэх захирал Никхил Рати, Сербийн Сангийн сайд Синиса Мали, Британийн Сангийн дэд сайд Роберт Жэнрик нарын хамт оролцлоо.

Европ болон Төв Азийн бүс нутгийн эрчимтэй хөгжиж буй орнуудын өнөөгийн зах зээлийн орчин, тэр дотроо хөрөнгө оруулалтын урсгал, өсөлтийн таамаг, хөрөнгийн зах зээлд гарах гэсэн үндсэн сэдвийн хүрээнд панел хэлэлцүүлэг хэлбэрээр явагдсан уг хуралд 400 гаруй олон улсын банк, санхүүгийн байгууллагууд, хөрөнгө оруулагчид оролцсон байна.

МОНГОЛ УЛСЫН БОЛОВСРОЛ, СОЁЛ, ШИНЖЛЭХ УХААН, СПОРТЫН САЙД Ц.ЦОГЗОЛМАА КЭМБРИДЖИЙН ОЛОН УЛСЫН ҮНЭЛГЭЭНИЙ ТӨВД ЗОЧЛОВ

Боловсрол, соёл, шинжлэх ухаан, спортын сайд Ц.Цогзолмаа Кэмбриджийн олон улсын үнэлгээний төвд 2019 оны 1 дүгээр сарын 24-ний өдөр зочилж, Кэмбриджийн стандартыг Монголд нэвтрүүлэх, Кэмбриджийн олон улсын үнэлгээний төвтэй цаашид үргэлжлүүлэн хамтран ажиллах асуудлаар санал солилцов.

 

Манай улсын боловсролын тогтолцоог олон улсын стандартад нийцүүлэхээр 2011 онд БСШУСЯ Кэмбриджийн олон улсын үнэлгээний төвтэй хамтран ажиллах Cанамж бичиг байгуулж, “Монгол–Кэмбриджийн боловсролын шинэчлэл” төслийг хэрэгжүүлж эхэлсэн. Хөтөлбөрийн хүрээнд Монголын ерөнхий боловсролын сургалтын зарим агуулга, хөтөлбөрүүдийг Кэмбриджийн хөтөлбөрт нийцүүлэн шинэчилсэн. Мөн Кэмбриджийн олон улсын хөтөлбөрөөр хичээллэх “Шинэ эрин”, “Шинэ эхлэл”, “Монгол тэмүүлэл” гэсэн дунд сургуулиудыг байгуулсан ба одоогоор 800 гаруй сурагчид тус сургуулиудад амжилттай суралцаж байна.

 

БОЛОВСРОЛ, СОЁЛ, ШИНЖЛЭХ УХААН, СПОРТЫН САЙД Ц.ЦОГЗОЛМАА ДЭЛХИЙН БОЛОВСРОЛЫН ЧУУЛГА УУЛЗАЛТАД ОРОЛЦОВ

Боловсрол, соёл, шинжлэх ухаан, спортын сайд Ц.Цогзолмаа Лондон хотноо 2019 оны 1 дүгээр сарын 21–23-ны өдрүүдэд зохион байгуулагдсан Дэлхийн боловсролын чуулга уулзалтад оролцов. Чуулга уулзалтад нийт 95 орны 1263 төлөөлөгч оролцож, “Бид юуг мэдснээр юуг бүтээж болох вэ: Боловсролын системийн бодлого, хэрэгжилтийг хөгжүүлэх, үр нөлөөг дээшлүүлэх нь” гэсэн үндсэн сэдвийн хүрээнд хэлэлцүүлэг өрнүүллээ.

 

Хэлэлцүүлэгт дэлхийн өнцөг булан бүрээс ирсэн боловсролын сайд нар өөрийн орны боловсролын салбарт хийгдэж буй шинэчлэл, тулгамдаж буй асуудал, түүнийг шийдвэрлэж байгаа арга зам, багшийн арга зүйг хөгжүүлэхэд баримталж буй бодлого, ололт, амжилтаасаа хуваалцахаас гадна томоохон их, дээд сургуулиудын багш, судлаачид дэлхийн боловсролын чиг хандлагын талаарх судалгааг танилцууллаа. Технологийн эрин зуунд амьдарч буй ирээдүйн иргэдэд боловсролыг үр өгөөжтэй, зөв арга барилаар олгохын тулд дижитал технологи, интернэтийн өсөн нэмэгдэж буй хэрэглээнд суурилсан сургалтын шинэ хөтөлбөр, боловсролын загвар боловсруулах шаардлагатай байгааг оролцогчид хэлэлцүүлгийн үеэр онцолж байв.

 

Чуулга уулзалтын үеэр сайд Ц.Цогзолмаа ИБУИНХУ, Украйн, Энэтхэг, Болгар зэрэг орны Боловсролын сайд нартай уулзалт хийж, хоёр орны боловсролын салбарын хамтын ажиллагааны асуудлаар санал солилцов.

 

Алдарт эхийн I, II одонгийн болзол хангасан эхчүүдэд хүргэх мэдээлэл

Алдарт эхийн I, II одонгийн болзол хангасан эхчүүд дараах материалыг бүрдүүлэн 2019 оны 3 дугаар сарын 31-ний дотор ЭСЯ-нд ирж, бүртгүүлнэ үү.

 

1.    Эхийн цахим иргэний үнэмлэх

2.    Алдарт эхийн одонгоор шагнуулахыг хүссэн өргөдөл

3.    Алдарт эхийн I, II одонгоор шагнагдах эхийн анкет

4.    Хүүхдүүдийн төрсний гэрчилгээ

5.    Насанд хүрсэн хүүхдүүдийн иргэний цахим үнэмлэх

1 2 3 … 6