Монгол-Британийн парламентын бүлгийн дарга С.Батболд тэргүүтэй УИХ-ын төлөөлөгчид Лондон хотноо ажлын айлчлал хийв

УИХ дахь Монгол-Британийн парламентын бүлгийн дарга С.Батболд тэргүүтэй УИХ-ын төлөөлөгчид Британийн парламент дахь Британи-Монголын бүлгийн урилгаар 2018 оны 10 дугаар сарын 29-нөөс 11 дүгээр сарын 02-ны өдрүүдэд Лондон хотноо ажлын айлчлал хийв. Энэ нь Британийн парламент дахь Олон улсын парламентын бүлгэмийн төлөөлөгчдийн Монгол Улсад 2017 оны 11 дүгээр сард хийсэн айлчлалын хариу айлчлал юм.

Айлчлалын хүрээнд УИХ-ын төлөөлөгчид Британийн парламентын Нийтийн танхимын дэд дарга хатагтай Роузи Уинтертон-д бараалхаж, Британийн парламентын нийтийн танхимын гишүүн, Британийн ГХХНЯ-ны Ази Номхон далайн асуудал хариуцсан Төрийн сайд Марк Фийлд, Британийн парламентын Нийтийн танхимын гишүүн, Британийн Засгийн газраас Монгол Улстай харилцах Худалдааны элч Жулиан Найт нартай уулзаж Лондонгийн хөрөнгийн биржэд зочлов.

УИХ-ын төлөөлөгчидтэй Британийн парламентын Нийтийн танхимын гишүүн, Британийн парламент дахь Британи-Монголын бүлгийн дарга Жон Гроган тэргүүтэй тус бүлгийн гишүүд уулзаж хамтын ажиллагааны талаар санал солилцов.

Британийн парламентын Нийтийн танхимд Гадаад хэрэг, хамтын нөхөрлөлийн яам (ГХХНЯ)-ны үйл ажиллагааны талаарх асуулгын цагаар “Британи-Монголын харилцааг хэрхэн үнэлж байгаа тухай” асуултад Британийн Гадаад хэргийн Төрийн сайд хариулт өгсөн хуралдааны үйл ажиллагааг төлөөлөгчид мөн сонирхов.     

Энэхүү айлчлал нь хоёр орны улс төрийн найрсаг харилцааг бэхжүүлэх, өндөр түвшний харилцан айлчлалын давтамжийг хадгалахад зохих хувь нэмэр оруулав.