Интернэтэд ташаа мэдээлэл гарч байна

 

 

Улаанбаатар /МОНЦАМЭ/. ‘АНУ-ын Ерөнхийлөгч Д.Трамп Монгол Улсын иргэдийг 180 хүртэлх хоногийн хугацаатай АНУ-д визгүй зорчуулах зарлигт гарын үсэг зурлаа’ гэсэн мэдээлэл гадны сайтад гарсантай холбогдуулж Монгол Улсаас АНУд суугаа Элчин сайдын яамнаас уг мэдээ худал, ташаа болохыг олон нийтэд мэдээлж байна..

http://cnn-channel.com/donald-trump-signs-a-visa-free-travel-policy-for-… линкэд байршуулсан мэдээлэл нь компьютерийн вирус тараах зорилготой байж мэдэх тул хэрэв ийм мэдээлэл хүлээн авсан бол нээхгүй байх, даруй устгахыг зөвлөж байна.

АНУ-д зорчих манай иргэд Улаанбаатар дахь АНУ-ын ЭСЯ-наас зохих журмын дагуу виз авах ба дэлгэрэнгүй мэдээллийг “https://mongolia.usembassy.gov/visas.html” цахим хуудаснаас авах боломжтой.

Монголын төлөөлөгчид Вэстминстерт зочлов


Британийн парламент дахь Британи-Монголын парламентын бүлгийн Нарийн бичгийн дарга, Британийн парламентын Дээд танхимын гишүүн Лорд Баунэсс ‘’Лондон Бизнес форум’’ болон ‘’ Монгол орны хөгжилд’’ 13-р чуулганы төлөөлөгчдийг хүндэтгэн Парламентын ордонд хүлээн авалт зохион байгуулав.

Вестминстерийн буюу парламентын ордоны Темза мөрний эрэг дээрх задгай тагт дээр болсон энэхүү хүлээн авалтад парламентын дээд, доод 2 танхимын бүх намын гишүүдийн төлөөлөл оролцов.

Улс орноо гадаадад сурталчлахад “GREAT” санаачилгын туршлага чухал  

ТНБД Д.Даваасүрэн Британийн Ерөнхий сайдын ажлын албаны дэргэдэх GREAT санаачилгын Олон нийттэй харилцах асуудал эрхэлсэн захирал Д.Уолполтой уулзаж GREAT санаачилгын үйл ажиллагаа, туршлагыг судлан улмаар Монгол Улсыг гадаадад сурталчлах зорилго бүхий ижил төстэй нэгж байгуулж үйл ажиллагааг нь эхлүүлээд байгаа тухай дурдав.  

Ноён Д.Уолпол 2016 оны 11 дүгээр сард Монгол Улсад айлчлахдаа Монгол Улсын ГХЯ-ны Гадаад сурталчилгаа, соёлын харилцааны газартай хамтарсан зөвлөмж гаргасныг онцлон тэмдэглэв.

   Хоёр улс НҮБ-ын хүрээнд амжилттай хамтран ажиллаж байна

ТНБД Д.Даваасүрэн Британийн парламентын Лордын танхимын гишүүн, ГХХНЯ-ны Хамтын нөхөрлөл, НҮБ-ын асуудал хариуцсан Төрийн сайд Баронесс Анелитэй уулзав. Баронесс Анели хэлэхдээ Монгол Улсыг геополитикийн өвөрмөц бүсэд ардчиллын бамбар болон гялалзаж байгаа амжилтаар нь бахархаж байна гэв.

Д.Даваасүрэн НҮБ, Ардчилсан орнуудын хамтын нийгэмлэгийн хүрээнд хоёр орны харилцаа, хамтын ажиллагаа амжилттай хэрэгжиж байгааг дурдаад Монгол Улс НҮБ-ын Хүний эрхийн Зөвлөлийн 2015 сонгуульд үнэмлэхүй олонхийн санал авахад Британи дэмжиж санал өгсөнд талархал илэрхийлэв.  

ГХЯ-ны Төрийн нарийн бичгийн дарга Британийн Гадаад хэргийн яамны орлогч сайдтай уулзав

ГХЯ-ны Төрийн нарийн бичгийн дарга Д.Даваасүрэн Британийн Гадаад хэрэг, Хамтын нөхөрлөлийн яамны Байнгын орлогч ТНБД (орлогч сайд) Саймон Макдоналд, Ази, Номхон далайн газрын Монгол, Японы газрын дарга Рик Шеарс нартай уулзаж Монгол Улс “гуравдагч хөрш”-тэй харилцах бодлогын хүрээнд Британитай харилцах, хамтран ажиллахад өндөр ач холбогдол өгсөөр ирсэн ба  улс төр, нийгэм, худалдаа, эдийн засгийн бүх чиглэлээр хамтын ажиллагаагаа бэхжүүлэх сонирхолтойг  тэмдэглэв. Ноён. Макдоналд хэлэхдээ, төрийн түүхэн уламжлал, хэв жаягийг хадгалах талаараа ч адил төстэй хоёр ард түмний харилцаа удаан жилийн түүхтэй бөгөөд Британичууд Монголыг сонирхох нь улам нэмэгдэж байгаа гэв.  


 

Уул уурхайн томоохон үзэсгэлэн нээгдлээ

“Mongolia Mining – 2017”  олон улсын уул уурхайн үзэсгэлэн Буянт-Ухаа” спорт цогцолборт нээгдлээ. 2010 оноос эхлэн хойш жил бүр зохион байгуулж буй энэхүү арга хэмжээнд уул уурхай, газрын тос олборлолт, эрэл, хайгуулын компаниуд болон ханган нийлүүлэгчид, үнэлгээ консалтингийн компаниуд, хөрөнгө оруулагч, банк санхүүгийн чиглэлээрх олон арван байгууллага,  компаниуд оролцож үйл ажиллагаагаа сурталчилж байна.

Д.Даваасүрэн Европын Сэргээн босголт, хөгжлийн банкны Гүйцэтгэх захиралтай уулзав 

Гадаад харилцааны яамны Төрийн нарийн бичгийн дарга Д.Даваасүрэн Европын сэргээн босголт, хөгжлийн банкны захирлуудын зөвлөл дэх Монголтой харилцах асуудал хариуцсан Гүйцэтгэх захирал Франс Вийкерстэй уулзав. Талууд цаашдын хамтын ажиллагааг өргөжүүлэх хүрээнд  эдийн засгийг төрөлжүүлэх, засаглалыг сайжруулах чиглэлд хамтран ажиллах боломжийн талаар санал солилцов. Уулзалтад Монгол Улсаас ИБУИНВУ-д суугаа Онц бөгөөд Бүрэн эрхт Элчин сайд С.Баяр, ЕСБХБ-ны Улаанбаатар дахь суурин төлөөлөгчийн үүрэг гүйцэтгэгч Ө.Азжаргал нар мөн оролцов. 

Монгол Улс 2006 онд ЕСБХБ-ны зээлжих эрхтэй гишүүн болсноос хойш  нийт 88 төсөл хэрэгжүүлж, хувийн хэвшилд 1.460 сая еврогийн урт хугацааны шууд хөрөнгө оруулалт, зээлийн санхүүжилт олгосон байна.

‘МОНГОЛ ОРНЫ ХӨГЖИЛД’ 13 ДУГААР ЧУУЛГА УУЛЗАЛТ ЛОНДОН ХОТНОО БОЛЛОО

Лондон дахь Элчин сайдын яам, Британи дахь Монголчуудын холбоо, “Цахим Өртөө Холбоо” ТББ хамтран зохион байгуулсан “Монгол орны хөгжилд” сэдэвт хилийн чаад дахь монгол иргэдийн 13 дахь удаагийн чуулга уулзалт 4 дүгээр сарын 06-ны өдөр Лондон хотноо болов. Энэ удаагийн чуулга уулзалтад гадаадын 14 оронд ажиллаж, суралцаж байгаа нийт 80 гаруй иргэд оролцов.

Чуулга уулзалтын нээлтэд Элчин сайд С.Баяр үг хэлэхдээ “эх орноо хөгжүүлэхийн төлөө хүсэл, тэмүүллээр сэтгэлээ чилээн явдаг Монгол хүний өөдрөг сайхан сэтгэл энэхүү чуулганы эх үндэс байдаггэв.

Чуулга уулзалтын гол зочноор Гадаад харилцааны яамны Төрийн нарийн бичгийн дарга Д.Даваасүрэн оролцож хилийн чанад дахь Монгол иргэдийн талаар төр, засгаас авч хэрэгжүүлж байгаа бодлого, үйл ажиллагааны талаар дэлгэрэнгүй танилцуулж, иргэдийн сонирхсон асуултад хариулт өгөв. 


Энэ удаагийн чуулга уулзалт “Монголын боломж” ерөнхий сэдвийн дор  дараах 3 салбар хуралдаанаар болов:

  1. “Монгол дахь бизнес эрхлэлт, бэрхшээл ба боломж”,
  2. “Мега төслүүд”,
  3. “Нийгэм Эрх зүйн төлөвшил”.

 

Чуулганд хилийн чанадад ажиллаж, амьдарч байгаа монголчуудаас гадна манай улсын нийгэм, эдийн засгийн төлөвийн талаар судалгаа хийдэг ОХУ, Австрали, АНУ-ын эрдэмтэд, судлаачид, “Монголын ардчиллын тэсвэр”, “Мега төслүүдийн төрөлжүүлэлтийг антропологийн үүднээс шинжлэх нь” зэрэг сэдвээр илтгэл хэлэлцүүлж оролцов. 

Чуулга уулзалтын ерөнхий ивээн тэтгэгчээр Европын Сэргээн Босголт Хөгжлийн банк, мэдээллийн ивээн тэтгэгчээр “Будда Продакшн”, “Азаа студи” тус тус ажиллав.


Чуулга уулзалтын үеэр хилийн чанад дахь монгол иргэдийн зөвлөлийн хуралдаан ЭСЯ-нд болсон бөгөөд хуралдаанд Гадаад Харилцааны Яамны Гадаад сурталчилгаа, соёлын харилцааны  газраас зохих танилцуулга хийж төлөөлөгчид санал бодлоо чөлөөтэй солилцов. “Монгол орны хөгжилд” ээлжит 14 дэх удаагийн чуулга уулзалтыг 2018 онд Берлин хотод зохион байгуулахаар товлосноор энэ удаагийн арга хэмжээ амжилттай өндөрлөв.

Лондонд морин хуурын ая, дуурийн дуу эгшиглэв

Лондон хотноо болж байгаа Монгол-Британий бизнессийн төлөөлөл оролцсон ‘Лондон Бизнес Форум’, хилийн чанад дахь монгол иргэдийн санаачилгаар жил бүрийн ‘Монгол орны хөгжилд’ 13 дахь удаагийн чуулга уулзалтын үйл ажиллагааны хүрээнд ‘ТАЛ НУТГИЙН САЛХИ’ сэдэвт соёлын арга хэмжээ ‘Asia House’ байгууллагын танхимд 4 дүгээр сарын 05-ны өдөр болж өнгөрөв. Энэхүү арга хэмжээг Элчин сайдын яам, Британи дахь Монгол Улсын Соёлын элч нар хамтран зохион байгуулсан бөгөөд 100 гаруй хүмүүс оролцов.

Соёлын арга хэмжээний нээлтэд Элчин сайд С.Баяр хэлсэнчлэн ийм арга хэмжээ нь хоёр орны ард түмэн улам ойртон дотносоход  чухал ач холбогдолтой юм. Элчин сайд “Asia House”-ийн Урлагын зөвлөлийн захирал Памела Кембераар уламжлан тус байгууллага хамтран ажиллаж, дэмжлэг үзүүлсэнд талархал илэрхийлэв.


Соёлын хөтөлбөрт морин хуурч, хөмийч Ц.Соёл-Эрдэнэ “Чингис хааны магтаал”, “Түмэн агтын төвөргөөн” зэрэг ая, дуу, Италид Улсад уран бүтээлээ турвиж байгаа дуурийн дуучин С.Аяана, Италийн дуучин Франко Серри, төгөлдөр хуурч Б.Мандахтуяа нар Монголын болон дэлхийн сонгодог дууны хэсгээс сонордууллаа.


Энэхүү арга хэмжээний үеэр Монгол Улсын соёлын хосгүй үнэт өвийг хадгалах, хамгаалах, өвлүүлэн үлдээх, дэлхий дахинд сурталчлан таниулахад үнэтэй хувь нэмэр оруулсаар байгаа Британий иргэн, Монголын Урлагийн зөвлөлийн олон улсын зөвлөх Сью Бөрнийг Монгол Улсын Ерөнхийлөгчийн зарлигаар “Алтангадас” одонгоор шагнасныг Элчин сайд С.Баяр гардуулан өгөв.

Түүнчлэн Монголын зураач, барималчдын уран бүтээлээс үзэгчид үзэж сонирхов.

Британийн парламентийн гишүүн, Гадаад худалдааны яамны байнгын орлогч төрийн нарийн бичгийн дарга Марк Гарньер Монгол Улсад айлчлав

Гадаад харилцааны сайд Ц.Мөнх-Оргил Британийн парламентийн гишүүн, Гадаад худалдааны яамны байнгын орлогч төрийн нарийн бичгийн дарга Марк Гарньерыг 2017 оны 3 дугаар сарын 31-ний өдөр хүлээн авч уулзав. Уулзалтаар хоёр орны худалдаа, эдийн засгийн хамтын ажиллагааны өнөөгийн байдал, хөрөнгө оруулалтыг нэмэгдүүлэх боломж болон бусад асуудлыг хөндөв.

 

Ноён М.Гарньер нь санхүү, боловсрол, автомашин технологийн салбарыг хариуцдаг бөгөөд Зам тээврийн яамны удирдлагатай уулзаж, “Эрдэнэс МГЛ”, “Улаанбаатар БҮК” зэрэг компаниудад зочлон үйл ажиллагаатай нь танилцав.

Мөн тэрээр Монголын хөрөнгийн биржид зочлон хоёрдогч зах зээлийн арилжааг нээх ёслолд оролцохдоо тус биржийн Лондонгийн хөрөнгийн биржтэй тогтоосон хамтын ажиллагааг хөгжүүлэх, Британийн хөрөнгө оруулалтын сангуудыг Монгол улсад хөрөнгө оруулахад дэмжин ажиллахаа илэрхийлэв.

Эх сурвалж. МОНЦАМЭ, Монголын хөрөнгийн бирж


 

1 3 4 5 6 7 24