ТУСГАЙ ҮҮРГИЙН НИСЛЭГТ НЭРС НЬ БАТАЛГААЖСАН ИРГЭДИЙН ТУХАЙ

Улсын онцгой комиссын Шуурхай штабаас 2020 оны 6 дугаар сарын 19-ний өдөр Франкфурт-Улаанбаатар чиглэлд үйлдэх тусгай үүргийн нислэгт ИБУИНХУ болон Бүгд Найрамдах Ирланд Улсаас хамрагдах иргэдийн нэрсийг эцэслэн баталгаажуулж тус ЭСЯ-нд ирүүлээд байна.

Тус ЭСЯ энэ удаагийн тусгай үүргийн нислэгт хамрагдахаар бүртгэлээ хийлгэсэн нийт 419 иргэний мэдээлэл, холбогдох өргөдөл, нотлох баримтыг УОК-ын Шуурхай штабт хүргүүлснээс ИБУИНХУ-аас 52, БНИУ-аас 6 иргэний нэрс баталгаажиж хариу ирсэн болно.

Үүнд өндөр настан ангилалд 9, бага насны хүүхэдтэй гэр бүл ангилалд 9, жирэмсэн ангилалд 1, эрүүл мэндийн шалтгаантай ангилалд 8, хөгжлийн бэрхшээлтэй ангилалд 3, бусад хүндэтгэн үзэх шалтгаантай ангилалд 28 иргэд тус тус хамрагдаж нутаг буцахаар болоод байна.

Тус ЭСЯ-наас нэрс нь баталгаажиж ирсэн эдгээр иргэдтэй тусгайлан утсаар холбогдож дараагийн шатны зааварчилгааг өгөөд байгаа болно.

Хэрэв Тантай ЭСЯ-наас холбоо тогтоогоогүй бол Та энэ удаагийн нислэгт хамрагдаагүй гэж ойлгоно уу.

Тусгай үүргийн нислэгт хамрагдах иргэдийн нэрс УОК-ын Шуурхай штаб дээр эцэслэгдэн ирсэн учраас эдгээр нэрсийг ЭСЯ-ны зүгээс нийтэд зарлах боломжгүйг үүгээр мэдэгдэж байна.

Уг онгоцонд УОК-ын Шуурхай штабын шийдвэрийн дагуу багтсан эсвэл багтаагүй ч, ЭСЯ-ны ажлыг ойлгон хүлээж авч, хамтран ажилласан иргэддээ талархал илэрхийлье.

ЛОНДОН ДАХЬ ЭСЯ

БРИТАНИ, ИРЛАНД, ИСЛАНДАД ОРШИН СУУГАА ИРГЭДИЙН АНХААРАЛД

БСШУСЯ, Харилцаа холбоо, мэдээллийн технологийн газар хамтран ерөнхий боловсролын 1-12 дугаар ангийн сурагчдад зориулсан Теле хичээлийг илүү хүртээмжтэй, шуурхай хүргэх зорилгоор “Econtent” мобайл аппликейшнийг хэрэглээнд нэвтрүүллээ.

Энэхүү цахим сургалтын аппликейшнийг гар утсандаа суулгаснаар дэлхийн аль ч улсаас Теле хичээлийн контентыг үнэ төлбөргүйгээр үзэх боломжтой болох юм.

Иймд эцэг, эхчүүд Та бүхэн хүүхэддээ монгол хэл, үндэсний соёлыг нь мартуулахгүй байлгах, шинэ зүйл зааж сургах үүднээс тус аппликейшнийг өргөнөөр ашиглахыг уриалж байна.

Econtent App татах холбоос:

www.econtent.edu.mn

Android – https://play.google.com/store/apps/details?id=esis.econtent

iOS – https://apps.apple.com/us/app/e-content/id1454356606…

Image may contain: phone

БРИТАНИ БОЛОН ИРЛАНД ДАХЬ МОНГОЛЧУУД ЦАР ТАХЛЫН УЛМААС ХҮНД БАЙДАЛД ОРСОН НЭГЭНДЭЭ ТУСЛАХ ТУСЛАМЖИЙН АЯНЫГ ӨРНҮҮЛЖ БАЙНА

Дэлхийг хамарсан цар тахал “COVID-19”-өөс шалтгаалан олон иргэд ажил, орлогогүй болж, хилийн чанадад түр хугацаагаар зорчихоор ирсэн Монголчууд хүнд байдалд ороод байгаа билээ.

Лондон хотноо оршин суугаа Ганзориг, Одонзул нар Лондон дахь хөл хөдөлгөөний хязгаарлалтын улмаас хүнд байдалд байгаа Монголчууддаа туслах аяныг эхлүүлж, одоогоор 50 гаруй айлын 100-аад хүнд тусламж үзүүлээд байна.

Хандивын аяныг Манчестер хотноо оршин суугаа Ганзул, Шинэбаяр, Ганболд нар дэмжин өөрсдийн оршин суугаа хот болон ойр орчмын тусламж хэрэгтэй байгаа айл өрх, оюутнуудад тусламж үзүүлж байна.

Британи дахь Монголчуудын холбоо болон иргэдийн зүгээс тэдний үйл ажиллагааг дэмжин хандив өргөж байгаа юм байна. Лондон, Манчестер хотуудад одоогоор нийтдээ 5000 орчим фунт стерлингийн тусламжийн сан бүрдээд байгаагаас 2000 гаруй фунт стерлингийг хүнс, амны хаалт, гар ариутгагч болон бусад ахуйн хэрэглээний зүйл аван тараах хэлбэрээр зарцуулаад байгаа ажээ.

Мөн Ирланд дахь Монголчууд маань цар тахлын улмаас хоол хүнсээ авч чадахгүй байгаа оюутнуудад тусламж үзүүлж байгаа бөгөөд одоогийн байдлаар 4000 гаруй еврогийн туслалцааг оюутнуудад үзүүлээд байгаа ажээ.

Ийнхүү Британи болон Ирландад оршин суугаа монгол иргэд маань “COVID-19” цар тахлын улмаас ажил, орлогогүй болсон, хилийн чанадад түр хугацаагаар зорчихоор ирсэн ч нутаг буцаж чадахгүй байгаа Монголчуудад туслах аяныг сайн дураараа зохион байгуулж байгааг иргэд талархан хүлээн авч байна.

 

НУТАГ БУЦАХ ХҮСЭЛТЭЙ ИРГЭДИЙН АНХААРАЛД

Улсын онцгой комисс ирэх 6 дугаар сард нийт 8 удаагийн тусгай үүргийн нислэгээр гадаад улсад саатаад буй нутаг буцах хүсэлтэй 2000 орчим Монгол Улсын иргэдийг татан авах төлөвлөгөөг гаргаад байна.

Эдгээрээс энэ оны 6 дугаар сарын 19-ний өдрийн Франкфурт-Улаанбаатар чиглэлд үйлдэх тусгай үүргийн нислэгт ИБУИНХУ, Бүгд Найрамдах Ирланд Улсад байгаа иргэдийг хамруулах боломжтой болоод байна.

УОК-ын дээрх шийдвэр нь зөвхөн нислэгүүдийн товтой холбоотой бөгөөд одоогоор нислэг бүрийн талаар нарийвчилсан мэдээлэл тодорхой бус байгааг анхаарна уу.

Тус ЭСЯ өнгөрсөн хугацаанд нутаг буцах хүсэлттэй иргэдийнхээ мэдээллийг бүртгэн авч, хүндэтгэн үзэх шалтгаан бүрээр ангилан УОК-т тухай бүр хүргүүлж ирсэн. Өнөөдрийн байдлаар ИБУИНХУ-д 322, Бүгд Найрамдах Ирланд Улсад 85 хүн нутаг буцахаар хүсэлтээ илэрхийлээд байна.

Нутаг буцах хүсэлтээ өгч, баталгаажуулалт авсан иргэдийн хувьд дахин имэйл ирүүлэх шаардлагагүй хэдий ч нэмэлт нөхцөл байдал илэрсэн эсвэл хүндэтгэн үзэх шалтгааныг нотолсон нотолгоо бүхий баримт бичгийг өргөдлийн хамтаар илгээх шаардлагатай гэж үзвэл эдгээрээ бидэнд ирүүлнэ үү.

Тусгай үүргийн нислэгт хамрагдах зорчигчдын нэрсийг өмнөх жишгээрээ УОК-ын Шуурхай штаб дээр ажиллаж буй ажлын хэсэг ЭСЯ-наас хүргүүлсэн нэгдсэн жагсаалт болон иргэдийн өргөдөл, нотлох баримтыг нягтлан үзэж, эцэслэн шийдвэрлэнэ. Шуурхай штаб нь зорчигчдын нэрсийг сонгон шалгаруулсны дараа тус ЭСЯ-нд мэдэгдэх болно. Үүний дараа ЭСЯ-наас нислэгт хамрагдахаар нэрс нь баталгаажсан иргэн бүртэй тухай бүр холбоо барьж, дараагийн шатны зааварчилгааг өгөөд явах юм.

Гадаадад саатаад байгаа иргэдийн нөхцөл байдал өмнөхөөсөө хүндэрч байгаа учраас энэ удаагийн тусгай үүргийн нислэгт УОК-оос тавьж ирсэн удаах 5 хүндэтгэн үзэх шалгуур үзүүлэлтээс гадна бусад зайлшгүй харгалзан үзэх шалтгаантай иргэд, оюутнуудаа багтаахаар ажиллаж байна.

Европын улс орнуудаас нийт 2382 хүн энэхүү тусгай үүргийн нислэгт багтахаар нэрсээ өгсөн байгаа ба УОК-ын Шуурхай штаб онгоцонд багтах зорчигчдын нэрсийг эцэслэх хүндхэн шийдвэртэй тулах учраас та бүгдийг ойлгож хандана гэдэгт итгэлтэй байна.

Хэрвээ Та бүртгүүлж амжаагүй бол дараах асуулгыг бөглөн тус ЭСЯ-ны secretary@embassyofmongolia.co.uk имэйл хаягт илгээнэ үү. (Зааврын дагуу бүрэн гүйцэд бөглөж ирүүлэхийг анхаарна уу)

1. Эцэг (эх)-ийн нэр (Монгол үсгээр бичнэ үү)
2. Өөрийн нэр (Монгол үсгээр бичнэ үү)
3. Регистрийн дугаар (Дугаарын эхний 2 үсгийг монгол үсгээр бичнэ үү)
4. Монгол Улсын Үндэсний гадаад паспортын дугаар оруулна уу (Жишээ: Е1234567)
5. Байнгын ажиллагаатай холбоо барих утасны дугаар
6. Байнгын ажиллагаатай холбоо барих имэйл хаяг
7. Оршин суугаа хот (Латин үсгээр бичнэ үү)
8. Монголд холбоо барих хүний нэр, утасны дугаар
9. Буцах нислэгийн маршрут, огноо (Хэрвээ захиалга хийсэн бөгөөд хүчинтэй хэвээрээ байгаа тохиолдолд)
10. Визийн ангилал, дуусах хугацаа
11. Түр ирсэн эсвэл байнгын оршин суугч эсэх
12. Хүндэтгэн үзэх шалтгаантай эсэх

A. Эрүүл мэндийн шалтгаантай – Эмчийн бичиг, эмнэлгийн магадалгааг хавсралтаар ирүүлнэ үү
B. Бага насны хүүхэдтэй гэр бүл (0-16 насны хүүхэдтэй) – Паспортын нүүр хуудасны зургийг хавсралтаар ирүүлнэ үү
C. Ахмад настан (60-аас дээш настай) – Паспортын нүүр хуудасны зургийг хавсралтаар ирүүлнэ үү
D. Жирэмсэн – Жирэмсний хугацааг бичиж, нотолгоог хавсралтаар ирүүлнэ үү
E. Хөгжлийн бэрхшээлтэй – Нөхцөл байдлаа товч, тодорхой тайлбарлаж, нотолгоо байгаа бол хавсралтаар ирүүлнэ үү
F. Богино хугацааны визтэй – Визийн ангилал, дуусах хугацааг бичиж, визийн хуудасны зургийг хавсралтаар ирүүлнэ үү
G. Байрлах газаргүй – Нөхцөл байдлаа товч, тодорхой тайлбарлаж, нотолгоо байгаа бол хавсралтаар ирүүлнэ үү
H. Оюутан – Сургуулийн нэр болон хэлний бэлтгэл, бакалавр, магистр, докторантур эсэхийг тодорхойлох
I. Санхүүгийн боломжгүй болсон – Нөхцөл байдлаа товч, тодорхой тайлбарлаж, нотолгоо байгаа бол хавсралтаар ирүүлнэ үү
J. Насанд хүрээгүй хүүхэд (Сурагч солилцооны хөтөлбөрөөр суралцаж байгаа харгалзах хүнгүй 16-18 насны хүүхэд) – Нөхцөл байдлаа товч, тодорхой тайлбарлаж, нотолгоог хавсралтаар ирүүлнэ үү
K. Бусад – Нөхцөл байдлаа товч, тодорхой тайлбарлаж, нотолгоо байгаа бол хавсралтаар ирүүлнэ үү

ЛОНДОН ДАХЬ ЭСЯ

No photo description available.

ГАМШГААС ХАМГААЛАХ ӨНДӨРЖҮҮЛСЭН БЭЛЭН БАЙДЛЫН ЗЭРЭГТ ХЭСЭГЧИЛСЭН БАЙДЛААР ШИЛЖСЭН ХУГАЦААГ СУНГАХ ТУХАЙ

КОВИД-19 цар тахлын дэгдэлтээс урьдчилан сэргийлэх зорилгоор Монгол Улсын Засгийн газар орон даяар зарласан өндөржүүлсэн бэлэн байдлын зэрэгт шилжсэн хугацаа болон Монгол Улсын хилийн бүх боомтоор нэвтрэх зорчигч тээврийн хөдөлгөөний хязгаарлалтыг энэ оны 6 дугаар сарын 30-ны өдрийг хүртэл сунгасан болно.

EXTENSION OF THE PARTIAL UNDERTAKING OF HIGH-ALERT PREPAREDNESS

In response to the COVID-19 pandemic, the Government of Mongolia on 27 May 2020 has decided to extend the partial undertaking of high-alert preparedness and continue the temporary suspension of the entry of all passengers through all border checkpoints of Mongolia until 30 June 2020.

БРИТАНИД ЗОРЧИХ ВИЗИЙН ХУГАЦАА НЬ ДУУСАЖ БУЙ ИРГЭДИЙН АНХААРАЛД

Британид зорчих визийн хугацаа нь 2020 оны 7 дугаар сарын 31-ний өдрөөс өмнө дуусаж байгаа иргэд Британийн Дотоод хэргийн яамны https://gov.smartwebportal.co.uk/homeof…/public/ho_form.html линкээр орж холбогдох цахим маягтыг англи хэл дээр бөглөн 7 дугаар сарын 31-ний өдрийг хүртэл визээ сунгуулна уу.

Хэрэв Та өмнө нь 5 дугаар сарын 31-ний өдрийг хүртэл визийн сунгалтаа хийлгэсэн бол Таны визийн хүчинтэй хугацаа 7 дугаар сарын 31-ний өдрийг хүртэл автоматаар сунгагдах юм байна.

ЛОНДОН ДАХЬ ЭСЯ

No photo description available.

ИРГЭДИЙН АНХААРАЛД

Британид шинэ төрлийн коронавирусийн шинж тэмдэгтэй таваас дээш насны хүн бүр Ковид-19-ийн шинжилгээнд хамрагдах боломжтой боллоо.

Хэрэв Танд Ковид-19-ийн шинж тэмдэг илэрч байгаа бол шинжилгээнд хамрагдахыг зөвлөе. Британийн Эрүүл мэндийн яамнаас Ковид-19-ийн шинж тэмдэгт үнэрлэх болон амтлах мэдрэхүйд өөрчлөлт орох, алдагдах явдлыг албан ёсоор нэмснийг анхаарна уу.

 

ЭЛЧИН САЙДЫН ЯАМ

ИРГЭДИЙН АНХААРАЛД

Британийн Засгийн газраас тус улсад түр хугацаагаар зорчиж байгаа болон визийн зөрчилтэй байгаа гадаадын иргэнээс Ковид-19-ийн шинжилгээнд хамрагдах шаардлага үүссэн нөхцөлд шинжилгээний хариу сөрөг гарахаас үл хамаарч үйлчилгээний төлбөр нэхэмжлэхгүй байх зарчмыг баримталж байна. Хэрэв шинжилгээгээр Ковид-19 илэрч, эмчилгээ шаардагдах бол үүнийг нь NHS мөн үнэ төлбөргүй хийнэ. Түүнчлэн, Ковид-19-ийн шинжилгээ, эмчилгээ хийлгэх гадаадын иргэнээс NHS-ийн зүгээс визийн холбогдолтой мэдээлэл шаардахгүй болно.

Та уг асуудалтай холбоотой дэлгэрэнгүй мэдээллийг https://www.gov.uk/gu…/nhs-entitlements-migrant-health-guide холбоосоос авах боломжтой.

ЭЛЧИН САЙДЫН ЯАМ

АНГЛИД ОРШИН СУУЖ БУЙ ИРГЭДИЙН АНХААРАЛД

Англид тогтоосон хөл хөдөлгөөний хязгаарлалтыг сулруулах тухай Британийн Засгийн газрын “нөхцөлт төлөвлөгөө” өнөөдөр (2020.05.13)-өөс хэрэгжиж эхэллээ. Уг төлөвлөгөөг дараах 3 үе шатлалаар хэрэгжүүлэх юм.

1 ДҮГЭЭР ҮЕ (5 ДУГААР САРЫН 13-НЫ ӨДРӨӨС)

– Гэрээсээ ажиллах боломжгүй байсан зарим салбарын ажилчин, алба хаагчид ажилдаа явах боломжтой болов. Үүнд хүнсний үйлдвэрлэл, барилга, үйлдвэр, ложистик болон лабораторид хийгддэг шинжлэх ухааны судалгааны зэрэг биечлэн гүйцэтгэхээс өөр боломжгүй салбарын ажилтнууд хамрагдах юм. Тэднийг нийтийн тээвэр аль болох ашиглахгүй байх, ашиглах тохиолдолд амны хаалт хэрэглэхийг зөвлөж буй.

– Гудамж талбай, цэцэрлэгт хүрээлэнгүүдэд биеийн тамираар хичээллэх, салхилах зэрэг хөдөлгөөнд цаг хугацаа, давтамжийн хязгааргүй боллоо. Мөн нэг гэр бүлийн гишүүд цэцэрлэгт хүрээлэнгийн орчинд хамтдаа спортын боломжит төрлүүдээр хичээллэх, цагийг чөлөөтэй өнгөрүүлэх боломжийг нээгдэв.

– Өөрийн амьдарч буй орчноосоо өөр газар, хот руу хувийн тээврийн хэрэгслээрээ зорчих боломжийг нээв. Гэхдээ Британийн хэмжээнд КОВИД-19-ийн халдварын тархалт харилцан адилгүй байгаа тул Шотланд, Уэйлс, Умард Ирланд руу зорчих бол тухайн улсад хэрэгжиж буй хөл хөдөлгөөний хязгаарлалтыг хүндэтгэх шаардлагатай.

2 ДУГААР ҮЕ (6 ДУГААР САРЫН 01-НИЙ ӨДРӨӨС)

– Бага сургуулийн бэлтгэл анги болон 1, 6 дугаар ангийн сурагчдын хичээлийг эхлүүлнэ.

– “КОВИД-19-ийн халдвараас хамгаалсан байх” тухай Засгийн газрын удирдамжийг мөрдөх боломжтой худалдааны байгууллагуудыг нээнэ. Нээгдэх худалдааны байгууллагын төрөл болон хугацаатай холбоотой тодорхой мэдээллийг Засгийн газраас тухайн үед нь өгнө.

– Спортын болон соёлын арга хэмжээг үзэгчгүйгээр зохион байгуулахыг зөвшөөрнө.

– Халдвар тархах эрсдэлийг боломжит бүх арга замаар хязгаарласны үндсэн дээр хот, суурин газруудын нийтийн тээврийн зарим шугамыг нээнэ.

3 ДУГААР ҮЕ (7 ДУГААР САРЫН 04-НИЙ ӨДРӨӨС)

Энэ үе шатанд үсчин, гоо сайхны газар, зоогийн газар, паб, зочид буудал, кино театр, сүм мөргөлийн газар зэрэг аль болох олон төрлийн үйлчилгээний болон олон нийтийн байгууллагуудын үйл ажиллагааг нээхийг зорино. Гагцхүү тухайн үед дотоодод дараах нөхцөл хангагдсан байх шаардлагатай юм.

– Эрүүл мэндийн салбар ачаалал даах чадамжтай байх;

– КОВИД-19-ийн улмаас өдөрт нас барах хүний тоо буурсаар байх;

– Халдварын тархалт буурч, хяналтад байлгах боломжтой хэмжээнд хүрсэн байх;

– Оношлуур болон хувийн аюулгүй байдлын хэрэгслийн нөөцийг хангалттай хэмжээнд бүрдүүлсэн байх;

– Халдварын хоёр дахь давлагаанд өртөхгүй нөхцөл бүрдсэн байх зэрэг болно.

Жич: 1. “Нөхцөлт төлөвлөгөө” гэдгийг КОВИД-19-ийн халдварын дамжиж буй хэмжигдэхүүн (RO буюу Reproductive value) бүхэл 1-ээс бага ёстой ба Британи дахь халдварын үзүүлэлтүүд эерэг хандлагатай байх үед хэрэгжинэ гэж ойлгоно. Сүүлийн үеийн байдлаар Британи дахь RO 0.5-0.9 байгаа болно.

2. Шотланд, Уэйлс болон Умард Ирландад тогтоосон хязгаарлалтын талаар тухайн нутгийн засаг захиргаа шийдвэр гаргана.

Англид хөл хөдөлгөөний хязгаарлалтыг сулруулж эхэлсэнтэй холбоотойгоор нийтийн талбай, тээврийн хэрэгслээр зорчих хүмүүсийн хөдөлгөөн нэмэгдэж буй тул иргэн Та амны хаалт ашиглаж хэвшинэ үү.

 

ЭЛЧИН САЙДЫН ЯАМ
2020.05.13

БРИТАНИ, ИРЛАНД, ИСЛАНДАД ОРШИН СУУГАА МОНГОЛ ИРГЭДИЙН АНХААРАЛД

Монгол Улсын Засгийн газраас 0–18 насны хүүхдүүдэд 2020 оны 4 дүгээр сарын 01-ний өдрөөс 10 дугаар сарын 01-ний өдрийг хүртэл мөнгөн тэтгэмж олгохоор шийдвэрлэсэн билээ.

Дэлхийг хамарсан цар тахлын энэ үед гадаадад оршин суугаа Монгол Улсын иргэдийн хүүхдүүдэд хүүхдийн мөнгөн тэтгэмжийн 100 мянган төгрөгийг хүсэлт гаргасан сараас нь эхлэн 2020 оны 10 дугаар сарын 01-ний өдрийг хүртэл олгохоор шийдвэрлэсэн байна. Хүүхдийн мөнгөн тэтгэмжийг та бүхэн Монгол Улс дахь өөрийн харьяалагдах хорооныхоо нийгмийн халамжинд итгэмжлэл хийх замаар бүртгүүлэн авах боломжтой юм.

Иймд тa дараах зүйлсийг бүрдүүлэн ЭСЯ-ны consul@embassyofmongolia.co.uk хаягаар итгэмжлэлээ шалгуулахаар ирүүлнэ үү.

  1. Бүрэн гүйцэд, засваргүй итгэмжлэл (Итгэмжлэлийн маягтыг ЭСЯ-ны www.embassyofmongolia.co.uk цахим хаягнаас авах боломжтой)
  2. Эцэг, эхийн хүчин төгөлдөр бичиг баримтын хуулбар (Монгол Улсын иргэний үнэмлэх эсвэл гадаад паспорт)
  3. Хүүхдийн төрсний гэрчилгээний хуулбар
  4. Итгэмжлэлийн төлбөр төлсөн баримтын хуулбар (Итгэмжлэлийн төлбөр, банкны мэдээллийг ЭСЯ-ны www.embassyofmongolia.co.uk цахим хаягнаас авах боломжтой)

The Embassy’s bank account information:

Name of payee: Embassy of Mongolia

Payee sort code: 40-50-37

Payee account number: 12322550

Name of payee’s bank: Bank of China

Payment description:

IBAN number: GB29BKCH40503712322550

Currency: GBP (£)

Таны итгэмжлэл шаардлага хангасан эсэхийг танд буцаан мэдэгдэхэд та өөрийн гарын үсгээ зуран баталгаажуулсан итгэмжлэлээ ЭСЯ-ны дараах хаягаар шуудангаар ирүүлнэ үү.

 

Embassy of Mongolia

8 Kensington Court

London, W8 5DL

ЛОНДОН ДАХЬ ЭЛЧИН САЙДЫН ЯАМ

1 2 3 4 5 36