Ангилал: Announcements

ИРЛАНД ДАХЬ МОНГОЛЧУУД НААДМАА ХИЙЛЭЭ

Ирландад ажиллаж, суралцаж буй Монголчууд Үндэснийхээ баяр наадмыг 2018 оны 7 дугаар сарын 1-ний өдөр Дублин хотноо өргөн дэлгэр тэмдэглэн өнгөрүүлэв.

Эх орон, элгэн саднаасаа хол байгаа Ирландын Монголчууд өөрсдийн наадмыг үндэсний уламжлал, зан заншлын үргэлжлэл болгон тэмдэглэснээс гадна Монгол ургийнхны баяр болгон хамтдаа нэгэн өдрийг дуу хуур, урлаг спортын арга хэмжээгээр баяжуулан цэнгэлдэв.

Наадамчин олон хүчит бөхийн барилдаан үзэж, сурын болон шагайн харвааны тэмцээнд цэц мэргэнээ сорив. Дублины наадамд Британи дахь монголчуудын язгуур урлагийн “Nomadic Tunes” хамтлаг ая дуугаа өргөж хурсан олныг цэнгүүлж алс холын Ирланд арлын наадмын талбайн жаврыг үргээлээ. Энэ үеэр монгол лимбэний ая эгшиглэхэд нар шарсан тэнгэрт хэсэгхэн үүл хуралдан сэрүүн салхи сэвэлзэхэд наадамчин олон билигшээн эх нутаг, түүх соёлоороо бахархан, гайхахын зэрэгцээ нүдэнд нь нулимс цийлэгнэн байх нь эх орноос илүү үнэтэй зүйл үгүйг харуулж байгаа мэт байв.

Наадмын талбайд “Дээлтэй монголчууд” уралдаанд оролцогсод гарч ирэн үндэсний дээл хувцасаараа гайхуулахад наадамчин олон уухай түрлэгээр тэднийг дэмжин шагшив.

Энэ удаагийн наадмын ажиллагааг сонин сайхан, амжилттай зохион байгуулахад Ирланд дахь монголчуудын холбооны Х.Оргил, М.Буяндэлгэр тэргүүтэй шижигнэсэн залуус идэвх, санаачилга гарган ажилласанд ЭСЯ-ны зүгээс гүн талархал илэрхийлж байна.

Мөн энэ үеэр Элчин сайдын яамны консулын ажилтан иргэний шинэчилсэн бүртгэл болон нотариатын бусад үйлчилгээг нийт 40 гаруй иргэнд үзүүлэв.

Гэрэл зураг: Б.Цэрэнбат

КЭМБРИДЖИЙН ИХ СУРГУУЛЬД МОНГОЛ СУДЛАЛЫН ФОРУМ ЗОХИОН БАЙГУУЛАГДАНА

Монгол – ИБУИНВУ-ын хооронд дипломат харилцаа тогтоосны 55 жилийн хүрээнд Кэмбриджийн их сургуулийн Монгол ба Өвөр Ази судлалын төв, Лондон дахь Монгол Улсын Элчин сайдын яам хамтран <Cambridge Mongolia Forum>-ийг 2018 оны 12 дугаар сарын 5-ны өдөр Кэмбриджийн их сургууль дээр зохион байгуулахаар тогтов.
Энэхү Форум нь цаашид хоёр жил тутам зохион байгуулагдах бөгөөд энэ жилийн хувьд Монголын соёл судлал, эдийн засаг, дипломат харилцаа болон улс төр судлалын тулгамдсан асуудлыг сонгов. Форумын үеэр Британи, Монголын судлаачид Монгол дахь засаглал ба хошуучлал, Монголын геополитик, геоэкономикс болон дипломат харилцаа, Монгол судлалыг хөгжүүлэх Монгол – Британийн хамтын ажиллагаа гэсэн гурван үндсэн сэдвүүдээр эрдэм шинжилгээний хэлэлцүүлэг өрнүүлэх юм.

 

МОНГОЛД ЕРӨНХИЙ БОЛОВСРОЛЫН СУРГУУЛЬ ТӨГСӨГЧДИЙН ЗӨВЛӨГӨӨН ЛОНДОН ХОТНОО БОЛОВ

Тус Элчин сайдын яам, Цахим Өртөө Холбоо, Британи Монголын Оюутны Холбоо, Лондон Коллеж Их Сургууль (University College London) -ийн Монгол Оюутны холбоо тус тус хамтран <Монголд ЕБС төгсөгчдийн зөвлөгөөн>-ийг 2018 оны 6 дугаар сарын 16-ны Бямба гаригт Лондон Коллеж Их Сургуулийн Антропологийн тэнхим дээр зохион байгуулав. <Сурагчийн EQ -г хөгжүүлэхэд багшийн оролцоо> сэдвийн доор явагдсан энэхүү зөвлөгөөнд Британид боловсрол судлалын чиглэлээр эрдмийн зэрэг хамгаалсан болон Монголд ЕБС болон их, дээд сургуульд багшилж байсан туршлагатай хүмүүс илтгэл хэлэлцүүллээ.

Зөвлөгөөнийг нээж Монгол Улсаас ИБУИНВУ-д суугаа Элчин сайдын яамны зөвлөх Л.Отгонбаяр үг хэлэв. Зөвлөгөөний үндсэн хэсэгт боловсрол судлалын магистр Л.Эрдэнэчимэг <Боловсролын шинчлэл: Өнгөрсөн, одоо ба ирээдүй> сэдвээр, магистр П.Ууганбаяр <Emotional Intelligence (EQ) – cэтгэл зүйн чадамж гэж юу вэ?> сэдвээр, Б.Моника <Хувь хүний хөгжилд багшийн үүрэг оролцоо> сэдвээр тус тус илтгэл хэлэлцүүлэв. Зөвлөгөөний хүрээнд <21 дүгээр зууны мэдлэг, ёс зүй> сэдвээр хэлэлцүүлэг хийсэн бөгөөд панелистаар магистр Д.Цэрэнбат, Соёлын элч, магистр Ж.Өнөрмаа, доктор Д.Бум-Очир, магистр П.Ууганбаяр нар оролцсон байна.

Зөвлөгөөнийг магистр Х.Улсболд, магистр Ж.Батдорж, боловсрол судлалын магистрант Б.Анар нар хөтлөн явууллаа. Уг зөвлөгөөний материалыг цахим гарын авлага болгон бэлтгэх бөгөөд Монголын ЕБС-иудын багш, судлаачид нээлттэй авч ашиглах бололцоотой болох юм.             

Консулын иж бүрэн үйлчилгээ, иргэний бичиг баримтын хөтлөлтийн 5 сарын аян үргэлжилж байна

Тус ЭСЯ-ны зүгээс суугаа болон хавсран суугаа улс дахь Монгол иргэддээ зориулан <<Зуны амралтаа төлөвлөе – Бичиг баримтаа цэгцэлье>> уриатай иргэдийг бичиг баримтжуулах, бичиг баримтын зөрчлийг арилгуулах, консулын үйлчилгээний хүртээмжийг дээшлүүлэх 5 сарын аяныг өрнүүлж байна.

Аяны хүрээнд консулын ажилтан 2018 оны 2 дугаар сард 23-24-ний өдрүүдэд хоёр өдрийн турш Ирландын Дублин хотод ажилласан билээ.

Мөн 2018 оны 3 дугаар сарын 23-ны өдөр Ноттингхам хотод, 24-ний өдөр Манчестер хотод, 4 дүгээр сарын 07-ны өдөр Шотландын Эдинбург хотод очиж үйлчилгээ үзүүлж Монголчуудтайгаа уулзлаа.

Аян маань 2018 оны 5 дугаар сард Исландын Рейкъявик хотод үргэлжилнэ.

Иргэд олноор амьдарч байгааг харгалзан Ирландын Дублин хотод 2018 оны 6-7 саруудын аль тохиромжтой гэж үзсэн өдөр консулын үйлчилгээг очиж үзүүлэхээр судалж байна.

ГАДААД ПАСПОРТЫН ХҮЧИНТЭЙ ХУГАЦААГ СУНГАХГҮЙ

 

 

 

 

 

 

Засгийн газрын 2017 оны 94 дүгээр тогтоолын хэрэгжилтийг хангах зорилгоор хилийн чанадад суугаа дипломат төлөөлөгчийн газрууд 2018 оны 1 дүгээр сарын 3-ны өдрөөс эхлэн энгийн гадаад паспортын хүчинтэй хугацаанд сунгалт хийхийг зогсоосныг үүгээр мэдэгдэж байна.

Гадаад паспортад сунгалт хийхгүй болсон нь олон улсын хэмжээнд мөрдөгдөж буй стандартыг бүрэн хангах, монгол иргэдийн гадаадад зорчих эрхийг баталгаажуулж, гадаад улсын хилээр нэвтрэхэд тулгарч буй хүндрэлийг арилгах зорилгоор хийгдэж буй ажил юм.

Жич: 2018 оны 1 дүгээр сарын 3-ны өдрөөс өмнө сунгалт хийлгэсэн гадаад паспортын сунгалт хүчинтэй хэвээр байна.

ЛОНДОН ХОТНОО ГЭРЭЛ ЗУРГИЙН ҮЗЭСГЭЛЭН ЗОХИОН БАЙГУУЛАГДАВ

Монгол бахархлын өдрийн хүрээнд Монгол Улсаас ИБУИНВУ-д суугаа ЭСЯ, Mongolian Community Organization хамтран <<Миний эх орон>> сэдэвтэй, Монголчуудын түүхэн ба өнөө цагийн ахуй, соёлыг харуулсан гэрэл зургийн үзэсгэлэнг Монголчууддаа зориулан 2017 оны 11 сарын 18-20-ны өдрүүдэд John Keys Resource Centre-д байгууллаа.

Үзэсгэлэнг ЭСЯ-ны зөвлөх Л.Отгонбаяр нээж үг хэлэв. Мөн Британид амьдарч байгаа Монгол хүүхдүүдийг төлөөлөн Holland Park дунд сургуулийн сурагч О.Содмандах АУЗ Д.Пүрэвдоржийн <<Тусгаар тогтнол>> шүлгээс уншиж сонирхуулав. Үзэсгэлэнд тавигдсан зургууд нь ЭСЯ-ны фондод хадгалагдаж байсан, хувь хүмүүсээс дурсгасан, Элчин сайд С.Баярын хувийн цуглуулгын хэсгээс тус тус бүрдсэн юм.

БРИТАНИД ЗОРЧИХ МОНГОЛ ИРГЭДЭД ЗОРИУЛСАН ЗӨВЛӨМЖҮҮД

1)    Хил, гаалиар нэвтрэх

 

  • Британийн хилийн шалганд орохоос өмнө “орох хуудас”(landing card)–ыг үнэн зөв, гаргацтай бөглөх, ийнхүү бөглөхдөө анх виз мэдүүлэхдээ өгсөн мэдээллээ оруулах шаардлагатай.
  • Паспортоо биедээ авч явах. Онгоцноос буухдаа Паспортоо орхиж буух, алдах тохиолдол цөөнгүй гардаг тул сонор сэрэмжтэй байна уу.
  • Суралцахаар ирж байгаа тохиолдолд сургуультайгаа холбоотой бичиг баримтуудаа гар тээшиндээ авч явах. Үүнд сургуульд тэнцсэн баталгааны дугаар (Confirmation of Acceptance for Studies (CAS) number) заавал байх шаардлагатай.
  • Зорчигчийн хувийн байдлыг тодруулах шаардлагатай гэж үзвэл Британийн хилийн албаны ажилтан өөрийн үзэмжээр тодорхой баримт бичгийг, тухайлбал банкны дансанд холбогдох мэдээллийг шаардаж болзошгүй.
  • Хилийн албаны ажилтан танаас Британид байх хугацаа, зорилгын талаар асуулт асууж хариулт авах эрхтэй гэдгийг санаж бэлтгэлтэй байх. Та анх виз мэдүүлснээс өөр зорилго, агуулга бүхий мэдээлэл өгөх нь таныг хилээр нэвтрүүлэхгүй байх, түр цагдан хорих, нутагт тань албадан буцаах арга хэмжээ авах үндэслэл болно.
  • Хүнсний ямар нэг бүтээгдэхүүн хилээр авч орохыг хориглоно.
  • Тодорхой бараа бүтээгдэхүүнийг тээшиндээ авч явах дээд хэмжээ байдаг. Жишээ нь янжуур тамхи 200 ширхэг буюу 2 блок, архи 1 литрээс дээш авч орохыг хориглодог.
  • Хуурамч буюу дууриамал бараа бүтээгдэхүүн, хар тамхи, зэвсэг, сум зэрэг хориотой бараа бүтээгдэхүүн авч орохыг хатуу хориглоно. Хилээр нэвтрүүлэхийг хориглосон бараа, бүтээгдэхүүний тухай мэдээллийг https://www.gov.uk/guidance/personal-food-plant-and-animal-product-imports -ээс уншиж танилцана уу.
  • Та биедээ 10.000 еврогоос их хэмжээний бэлэн мөнгө авч явж байгаа тохиолдолд Гаалийн мэдүүлэг бөглөх шаардлагатай. (https://www.gov.uk/bringing-cash-into-uk)
  • Бусдын бичиг баримтыг авч явж хэрхэвч болохгүй. Бусдын бичиг баримтыг зайлшгүй авч явах шаардлагатай тохиолдолд энэ тухай зохих нотолгоо тайлбарыг Англи хэлээр бичиж хавсаргасан байх нь зүйтэй.
  • Хилийн албаны ажилтнуудтай зохисгүй харилцах, гүтгэх, арьс өнгө, бусад байдлаар ялгаварласан хандлага гаргах, худал хэлэх зэргээр авирлавал энэ бүхэн тань ямагт бүртгэгдэж, мөн таныг хилээр нэвтрүүлэхгүй байх үндэслэл болох анхаарна уу.

 

2)     Хилээр нэвтэрсний дараа

 

  • Танд олгосон визийн мэдээлэлд визийн хугацаа, ангилал, төрөл, ажиллах эрхтэй эсэх, эрхтэй бол долоо хоногт ажиллах цагийн хязгаарыг тус тус багтаасан байдаг. Эдгээр нөхцөл, болзол зөрчигдсөн тохиолдолд таныг баривчлах, улмаар тань албадан гаргах үндэслэл болдог.
  • Аялалын виз, эсхүл ажиллах эрхгүй визтэй ирээд ажил хийж байхдаа ажлын байран дээрээс Цагаачлалын албаны ээлжит ба ээлжит бус шалгалтын үеэр баригдах тохиолдол нэлээд их байна.
  • Мөн визийн хугацаа нь таны тус улсад амьдрах хугацаа биш гэдгийг анхаарна уу. Тухайлбал, “С” ангиллын аялалын виз, олон удаагийн орох эрхтэй 6 сарын хугацаатай олгогдсон нь таныг тус улсад 6 сарын турш амьдрах эрхтэй гэсэн үг биш. Британид таны байх хугацаа таны виз анх мэдүүлэхдээ бичиж өгсөн хугацаагаар тогтоогдоно гэдгийг анхаарна уу. Хэрэв анх виз мэдүүлснээсээ урт хугацаагаар Британид оршин суусан тохиолдолд энэ нь таны дараагийн визэнд сөргөөр нөлөөлнө.

 

 

3)    Оюутнуудад зориулсан зөвлөмж

 

  • Британид ирээд та хамгийн түрүүнд сургуульдаа бүртгүүлж оюутны үнэмлэх (Student ID)-ээ авч, өөрт хамгийн ойр орших Өрхийн эмнэлэг (General Practitioner)-дээ бүртгүүлэх хэрэгтэй.
  • Элчин сайдын яаманд бүртгүүлэх. Яаралтай хэл дуулгах, ар гэрийн гачигдал, өвдөх зэрэг аливаа асуудал гарахад та ЭСЯ-ндаа бүртгүүлсэн байвал танд тусламж үзүүлэхэд хялбар болно. Бүртгүүлэхийн тулд http://embassyofmongolia.co.uk/?p=214&lang=mn -аас зохих бүртгэлийн маягтыг татан авч бөглөн ЭСЯ-ны otgonbayar@embassyofmongolia.co.uk хаягт илгээх.
  • Аливаа гэрээний нөхцөлийг урьдаас сайтар уншиж танилцаж байх. Байр түрээслэх, гар утас авах, фитнес клубын гишүүн болох гэх мэт бүх төрлийн үйлчилгээ авахад гэрээ байгуулах хэрэгтэй болдог. Энэ үед гэрээний бүх нөхцөлийг уншаагүйгээс хожим гэрээ цуцалж болохгүй нөхцөлийг зөвшөөрсөн байх, илүү их төлбөр, торгууль төлөх байдалд орох нь түгээмэл тул гэрээний нөхцөлийг нэг бүрчлэн уншсаны үндсэн дээр сонголт хийх шаардлагатай.
  • Хувийн бичиг баримтуудаа нягтлах. Та өөрийн Паспорт (Гадаад паспорт) -ын хүчинтэй хугацааг нягталж, дуусахаас нь өмнө Лондон дахь ЭСЯ-нд хандаж сунгуулах шаардлагатай. Мөн виз, бусад бичиг баримтын хүчинтэй хугацааг нягталж байх нь таны үүрэг хариуцлага гэдгийг анхаарна уу.
  • Британийн хууль дүрэм. Гудамж талбайд хог, нус цэрээ хаях, бие засах зэрэг үйлдэл нь тус улсад эрүүгийн хэрэгт тооцогддог. Монгол улсын иргэн согтуудаа Лондон хотын нэгэн паркад хөнгөн бие зассаны улмаас цагдаагийн байгууллагад баривчлагдаж, улмаар 2 жилийн хорих ялаар шийтгүүлсэн явдал 2017 онд гарсан. Олон нийтийн газар бусдыг удаан хугацаагаар ширтэх, бусдын биед хүрэх, бүдүүлэг харьцах, бусдыг арьс өнгө, гарал үүсэл, шашин болон итгэл үнэмшил, хүйсээр тохуурхах, доромжлох, ялгаварлах нь хуулийн хатуу ялтай байдаг. Харилцаандаа ийм хандлага төдий гаргасан оюутан сургуулиасаа хөөгдсөн тохиолдол бий. Тус улс нь нийтийн эзэмшлийн зам талбайг бүрэн камержуулсан хяналтанд байлгадаг, үйлчилгээний газруудад дүрс, дууны бичлэг хийдэг. Гэмт хэрэг зөрчлөөс хэрхэн сэргийлэх, юуг гэмт хэрэг, зөрчил гэж тооцдог талаар дэлгэрэнгүйг http://www.cps.gov.uk/legal/v_to_z/youth_offenders/ –аас уншиж танилцана уу.
  • Бичиг баримтаа алдах. Оюутнууд Паспорт, виз, оршин суух үнэмлэх – Biometric Residence Permits (BRPs) бичиг баримтаа гээх, хулгайд алдах явдал маш ихээр гардаг. Манай иргэд нэгнийхээ бичиг баримтыг хулгайлах, улмаар түүнийг цааш нь худалдахаар завдсан тохиолдол удаа дараа гарсан. Харамсалтай нь бусдын бичиг баримтаар ажиллаж, амьдрах явдал тус улс дахь Монгол иргэдийн дунд түгээмэл байдаг. Та бичиг баримтаа гээгдүүлдсэн, хулгайд алдсан тохиолдолд цаг алдалгүй ойролцоох цагдаагийн байгууллагадаа мэдэгдэж бүртгүүлэх, ийнхүү бүртгүүлсэн тухай тодорхойлолт нотолгоо авах шаардлагатай. BRP-ийг нөхөж авах тохиолдол дараах холбоост байгаа зааврын дагуу нөхөн авах талаарх мэдээллийг https://www.gov.uk/biometric-residence-permits/replace -ээс уншиж танилцана уу.
  • UK giin Mongol Zar -д нэгдэх. Энэ нь алба, амины олон асуудлаар мэдээлэл солилцдог Фейсбүүкийн хамгийн том зарын булан тул Британи дахь Монголчуудын холбоо, Элчин сайдын яамны үйл ажиллагааны зар мэдээг уг группээр дамжуулан хүргэдэг. Энэ группд заавал нэгдээрэй.
  • Стрессээс зайлсхийх. Цаг агаарын ялгаатай байдлаас хамаарч Монголоос ирсэн оюутнууд стресст орох явдал гардаг. Иймд цаг агаарын мэдээ үзэж нартай үед заавал гарч салхилах, мөн найз нөхөдтэй болж цагийг сонирхолтой өнгөрөөх, Монголчуудын дунд зохиогддог арга хэмжээнд оролцох, сайн дураар ажиллах зэргээр өөрийгөө ганцаардах, стресст орох сэргийлээрэй.

 

4)    Цахим залилан, цахим гэмт хэргээс сэргийлэх

 

  • Интэрнэтээр эд зүйлс зарах, худалдан авах, байр, өрөө хөлслөх гэрээ байгуулах, урьдчилгаа болон барьцаа төлөх зэрэг төрөл бүрийн зар гардаг болсон. Та баталгаагүй цахим хуудас, худалдаа, үйлчилгээ борлуулах гэсэн хуурамч саналуудаас болгоомжилж сайтар нягталж байх шаардлагатай.
  • Баталгаатай эсэх нь мэдэгдэхгүй тохиолдолд бусдад өөрийн бүтэн нэр, хаяг, банкны дансны мэдээлэл, цахим шуудан, утасны дугаарыг хэрхэвч өгөхгүй байх нь зүйтэй.
  • Таны банк болон санхүүгийн байгууллагын нэрээр хуурамч цахим шуудан илгээж банкны мэдээлэл нууц үгээ өөрчлөх хүсэлт ирсэн тохиололд илгээгчийн цахим шуудангийн хаягийг сайтар шалгах шаардлагатай бөгөөд энэ асуудлаар банкиндаа хандаж лавлаж болно.
  • Банкны картын дугаарыг онлайн худалдааны олон веб сайтад бүртгүүлэх, сануулж орхихоос зайлсхийх шаардлагатай.
  • Таны хэрэглэдэг компъютер тань вирусын эсрэг програмтай эсэх, тэдгээрийн хугацааг зохих ёсоор сунгасан эсэхийг сайтар нягталж байна уу.
  • Худалдан аваагүй бараа, үйлчилгээний нэхэмжлэхийг нээж үзэхгүй байх нь зүйтэй, вирус нь зар сурталчилгааны болон хонжворын хэлбэрээр ирж таныг тодорхой линк дээр дарж нэвтэрч орохыг санал болгох нь түгээмэл байдгийг анхаарах.
  • Хэрэв та цахим залилангийн хохирогч болсон тохиолдолд Цахим гэмт хэрэгтэй тэмцэх төвийн 0300 123 2040 дугаарын утас руу цаг алдалгүй залгаж, зөвлөгөө авах, өргөдөл гомдлоо бүртгүүлэх боломжтой. Таны найз нөхөд, ойр орчинд тань цахим гэмт хэрэг үйлдэгдэж байгаа бол энэ тухай мэдээллийг 0300 123 2040 дугаарын утсаар мэдээлж бусдыг гэмт хэргийн хохирогч болохоос сэргийлэх боломжтой. Цахим гэмт хэрэгтэй холбоотой дэлгэрэнгүй мэдээллийг https://www.actionfraud.police.uk/about-us -ээс авна уу.

 

МАНЧЕСТЕР ХОТНОО “МОНГОЛ СОЁЛ, ШАГАЙН ХАРВААНЫ ӨДӨРЛӨГ” БОЛЛОО

Монгол Улсын Элчин сайдын яам, Монголчуудын холбоо, Монголын Шагайн Харвааны Холбооны Британи дахь салбар холбооноос хамтран “Монгол соёл, шагайн харвааны өдөрлөг”-ийг хоёр дахь жилдээ Манчестер хотноо 2017 оны 10 сарын 15 ны ням гаригт зохион байгууллаа.

Өдөрлөгийг Монгол морин хуурын аялгуу, монгол ардын уртын дуу “Алсын газрын зэрэглээ” дуугаар эхлүүлэв.  

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Шагайн харваачдын нөхөрсөг тэмцээнд Лондон, Манчестер хотын багууд өрсөлдөв. Лондон хотын 2, Манчестер хотын 2 багуудын хооронд маш өрсөлдөөнтэй болж, 3 баг хожил тэнцэж сум уралдуулсанаар Э.Идэр ахлагчтай Манчестер хотын баг тэргүүн байрын өргөмжлөл, мөнгөн шагнал, Д.Болд ахлагчтай Лондон хотын баг тэргүүн дэд байрын өргөмжлөл мөнгөн шагналаар шагнагдав.

Энэ үеэр сонирхогчид, харваачдын дунд хувийн цуваа харвааны нээлттэй тэмцээн болов. Энэ төрөлд Манчестерийн Ш.Гантулга 9 онож тэргүүн байрын өргөмжлөл, мөнгөн шагнал, Лондон хотын Д.Болд 7 онож тэргүүн дэд байрын өргөмжлөл, мөнгөн шагнал, мөн Манчестерийн Б.Батбаяр 6 онож гутгаар байрыг эзэлж өргөмжлөл мөнгөн шагналын эзэд боллоо.

Нэгэн онцлох үйл явдал болсон нь Ноттинхам хотод амьдардаг шагайн харваа сонирхогчидийг дэмжих зорилгоор Лондон хотын харваач Б.Батсуурь өөрийн санаачилгаар шагайн мод хийж ирснийг Ноттанхам хотоос хүрэлцэн ирсэн морин хуурч Нямдаваад гардуулж өглөө.  

Мөн өдөрлөгт хүрэлцэн ирсэн бүсгүйчүүдийн дунд уран үйл хатгах тэмцээн явагдаж, тэргүүн байрт Д.Энхтуяа шалгарч, өргөмжлөл, үнэ бүхий зүйлээр шагнагдав.

Өдөрлөгийн сонирхол татсан нэг хэсэг нь зочдын дунд Монгол дууны караоке тэмцээн болсон явдал байв.

ЭСЯ-ны консулын ажилтан Манчестер хот орчимд амьдардаг иргэддээ консулын бүх төрлийн үйлчилгээ үзүүлэв.

Арга хэмжээг ивээн тэтгэсэн Сумо Сүши төвийн хамт олон, Монголчуудын холбоо, Номадик Тюнс хамтлаг, М.Машбаяр Ерөнхийлөгчтэй Монголын Шагайн Харвааны Британи дахь салбар Холбооны хамт олон, Osechi шагайн өргөө клуб, өдөрлөгийг хөтлөн явуулсан М.Мөнхзоригт, Урнаа, тэдний гэр бүлийнхэнд талархал илэрхийлье.   

МАНЧЕСТЕР ХОТНОО МОНГОЛ СОЁЛ, ШАГАЙН ХАРВААНЫ ӨДӨРЛӨГ ХОЁР ДАХЬ ЖИЛДЭЭ БОЛНО

Монгол Улсын Элчин сайдын яам, М.Машбаяр Ерөнхийлөгчтэй Монгол Шагайн Харвааны Холбооны Британи дахь салбар холбоо хамтран Манчестер хотноо хоёр дахь жилдээ Монгол соёл, Шагайн Харвааны Өдөрлөгийг 2017 оны 10 дугаар сарын 15-ны өдрийн Ням гаригт зохион байгуулна. Өдөрлөгийн үеэр Монгол шагайн харвааны тэмцээн, танилцуулах сургалт, Үндэсний бөхийн бэсрэг наадам, хүүхдийн хөгжөөнт тоглоомууд, эмэгтэйчүүдийн дунд уран үйлийн уралдаан, караоке тэмцээн тус тус явагдана. Ерөнхий спонсороор SUMA Sushi Bar оролцож байна.

Мөн энэ өдөр тус Элчин сайдын яамны консул 10-15 цагийн хооронд консулын үйлчилгээ үзүүлнэ. Жич: Консулын үйлчилгээ авах иргэд ЭСЯ-ны цахим хуудаст заасан бичиг баримтыг бүрдүүлж, холбогдох маягтыг бөглөж бэлтгэн ирж үйлчлүүлнэ үү. Хаяг: SUMA Sushi Bar, Unit 4, Thornton House, Crossbank way, Oldham, OI8 1HE

Британи дахь Монголчуудын МонБрит сагсан бөмбөгийн тэмцээн амжилттай болж өнгөрөв

МОНБРИТ – Британи дахь монголчуудын үүсгэл санаачилгын байгууллагаас ивээн тэтгэж зохион байгуулсан 2017 оны сагсан бөмбөгийн аварга шалгаруулах тэмцээн Лондон хотноо амжилттай болж өнгөрөв. Энэ удаагийн тэмцээнд Британид амьдарч, ажиллаж, сурч байгаа монгол иргэдийн эмэгтэй 5, эрэгтэй 9 нийт 14 баг алтан медаль, аваргын цомын төлөө өрсөлдсөн бөгөөд эмэгтэй багуудаас Монбрит баг нэгдүгээр, Манчестэр бийз баг хоёрдугаар, Залуус баг гуравдугаар байрт, эрэгтэй багуудаас Манчестер дэвилз нэгдүгээр, Монбрит -2 хоёрдугаар, Тод баг гуравдугаар байрт шалгарав.

Алтан медаль хүртсэн Монбрит (эмэгтэй), Манчестер дэвилз (эрэгтэй ) багууд шилжин явах цомоор шагнуулав. 2017 оны шилдэг эмэгтэй тоглогчоор Монбрит багийн довтлогч Г.Энхчимэг, эрэгтэй тоглогчоор Манчестер дэвилз багийн довтлогч Ч.Энхтайван нар шалгарч тусгай шагнал хүртэв.

Цаашид сагсан бөмбөгийн МОНБРИТ баг жил бүрийн аварга шалгаруулах тэмцээнийг ивээн тэтгэж, зохион байгуулж байхаа илэрхийлэв. Энэ удаагийн тэмцээнд Монголын сагсан бөмбөгийн холбоо, Лондон дахь Элчин сайдын яам хамтран зохион байгуулагчаар оролцов.

Тэмцээний Ерөнхий шүүгчээр ажилласан ЭСЯ-ны Элчин зөвлөх Б.Одонжил энэ удаагийн тэмцээнийг санаачилж, амжилттай зохион байгуулсан сагсан бөмбөгийн МОНБРИТ багийн нийт гишүүдэд талархал илэрхийлээд  эх орноосоо алсад амьдарч байгаа та биднийг ийм арга хэмжээ улам нэгтгэж, уулзаж, ярилцах, амрах таатай боломжийг олгож байна гэв.  

Тэмцээнд оролцсон болон, хүрэлцэн ирж багуудаа дэмжсэн нийт хүмүүст талархал илэрхийлье.

 

1 2 3 … 5