МЭНДЧИЛГЭЭ
Айлчлан ирж буй 17 дугаар жарны “Хотол төгс” хэмээх
төмөр хулгана жилдээ элгээрээ энх амгалан,
төрлөөрөө төвшин амгалан байхын өлзийтэй сайхан ерөөлийг
Британи дахь Монголчууддаа өргөн дэвшүүлье.
ИБУИНХУ-д суугаа
Элчин сайдын яам
Британид шинэ төрлийн коронавирусын халдварын 2 тохиолдол бүртгэгдсэнтэй холбогдуулж ДЭМБ (WHO)-аас гаргасан зөвлөмжийн дагуу эрүүл ахуйн байдлаа сахин хамгаалахыг та бүхэндээ уриалж, зөвлөж байна. ДЭМБ-ын зөвлөмжтэй https://www.who.int/emergencies/diseases/novel-coronavirus-2019/advice-for-public холбоост хандаж танилцана уу.
Түүнчлэн, Британийн холбогдох байгууллагууд иргэддээ хандаж зайлшгүй шаардлагаас бусад тохиолдолд БНХАУ-д зорчихгүй байх, БНХАУ-ын Хубэй мужид огт зорчихгүй байх, сүүлийн 14 хоногийн дотор БНХАУ-ын Үхань (Wuhan) хотод зорчоод ирсэн бол 14 хоногийн хугацаанд гэрээсээ гарахгүй байх, Үханьд зорчоод ирсэн талаараа NHS-ын 111 дугаарт холбогдож мэдэгдэх, нийтийн тээвэр, таксигаар үйлчлүүлэхгүй байх, хүүхдүүдээ цэцэрлэг, сургуульд хүргэж өгөх, авах болон эмийн сан орох зэрэг ажлыг ойр дотны хүмүүсдээ хандаж зохицуулах, мөн сүүлийн 14 хоногийн хугацаанд БНХАУ-д зорчсон бөгөөд халуурах, ханиалгах, амьсгаа давчдах зэрэг шинж тэмдэг илэрч буй бол өөрийгөө тусгаарлах, БНХАУ-д зорчоод ирсэн талаараа 111 дугаарт мэдэгдэх зэрэг зөвлөжийг өгч буйг мэдээлье.
Энэ тухай дэлгэрэнгүй мэдээллийг https://www.gov.uk/guidance/wuhan-novel-coronavirus-information-for-the-public холбоосоос авах боломжтой.
Яаралтай үед ЭСЯ-тай холбоо барих утасны дугаар: +44 (0) 7874 916606
Монгол Улс судалгаанд суурилсан их сургуулиудыг байгуулахаар ажиллаж буйтай холбогдуулан УИХ-ын Нийгмийн бодлого, боловсрол, соёл, шинжлэх ухааны Байнгын хорооны дарга Д.Оюунхорол тэргүүтэй төлөөлөгчид Кэмбридж, Баат зэрэг их сургуулиудын үйл ажиллагаатай танилцаж, их сургуулиудын судалгааг хэрхэн санхүүжүүлдэг, улс орны нийгэм, эдийн засгийн хөгжилд үр өгөөжтэй байхаар хэрхэн зохицуулдаг талаар туршлага судлав.
Түүнчлэн, Кэмбриджийн олон улсын сургалтын үнэлгээний төвд зочилж, Кэмбриджийн стандартыг Монголд нэвтрүүлэх, тус төвтэй цаашид үргэлжлүүлэн хамтран ажиллах асуудлаар санал солилцов. Манай улсын боловсролын тогтолцоог олон улсын стандартад нийцүүлэхээр 2011 онд БСШУСЯ Кэмбриджийн олон улсын сургалтын үнэлгээний төвтэй хамтран ажиллах Cанамж бичиг байгуулж, “Монгол–Кэмбриджийн боловсролын шинэчлэл” төслийг хэрэгжүүлж эхэлсэн нь өнөөг хүртэл манай боловсролын салбарт эерэг үр дүнг авчирсаар байгаа билээ.
УИХ-ын Нийгмийн бодлого, боловсрол, соёл, шинжлэх ухааны Байнгын хорооны дарга Д.Оюунхорол тэргүүтэй төлөөлөгчид Лондон хотноо ажиллаж, Британийн Гадаад хэрэг, хамтын нөхөрлөлийн яам, Боловсролын яам, Бизнес, эрчим хүч, аж үйлдвэрийн стратегийн яамны албан хүмүүстэй уулзалт хийв.
Уулзалтаар Монгол Улсын нийгэм, эдийн засгийн хөгжилд нөлөөлөх их сургуулиудын үүрэг, оролцоог нэмэгдүүлэхийн тулд судалгаанд суурилсан их сургууль байгуулах үндэсний хөтөлбөр батлан ажиллаж байгааг танилцуулан энэ чиглэлийн дагуух Британийн арга барил, туршлагын талаар санал солилцов. Түүнчлэн, олон улсын сургалтын үнэлгээний “PISA – Programme for International Student Assessment” системд орсон Британийн туршлагаас суралцах болон хоёр талын хамтын ажиллалааг өргөжүүлэх бусад боломжийн талаар санал солилцов.
Та бүхэн итгэмжлэл ирсэн эсэхээ шалгах бол http://www.consul.mn/index.php?moduls=22 уг холбоосон дээр дарж орно уу.
Британи дахь Монголчуудын дунд “Монбрит-2019” сагсан бөмбөгийн аварга шалгаруулах тэмцээн 2019 оны 9 дүгээр сарын 28-ны өдөр Лондон хотноо амжилттай болж өндөрлөлөө. Тус тэмцээн нь уламжлал болгон 3 дахь жилдээ зохион байгуулагдаж байгаа бөгөөд энэ удаагийн тэмцээнд нийт 18 баг тамирчид хурд, хүчээ сорьжээ.
Элчин сайд Н.Тулга тэмцээнийг нээн тамирчид, хөгжөөн дэмжигчдэд хандан хэлсэн үгэндээ Британид сурч, ажиллаж, амьдарч байгаа нийт Монголчуудын хооронд бие биетэйгээ танилцах, мэдээлэл солилцох, нөхөрсөг харилцаа холбоог бэхжүүлэх, найрсаг уур амьсгалыг бүрдүүлэхэд энэхүү тэмцээн чухал ач холбогдолтой болохыг онцлов. Энэ удаагийн тэмцээнд Элчин сайд Н.Тулга тэргүүтэй “Embassy” баг оролцсон болно.
Сагсан бөмбөгийн Монбрит клубын тэмцээн нь Британид оршин сууж буй Монголчуудыг спортоор дамжуулж ойртон нөхөрлүүлэx, тэдний чөлөөт цагийг зөв зохистой өнгөрүүлэх, улмаар амжилттай оролцсон баг тамирчдыг Европын орнуудад зохиогддог тэмцээнүүдэд тогтмол оролцуулахад оршдог юм.
Монгол Улсаас Ирланд Улсад суух Онц бөгөөд Бүрэн эрхт Элчин сайд Н.Тулга Ирландын Ерөнхийлөгч Майкл Хиггинст Итгэмжлэх жуух бичгээ 2019 оны 9 дүгээр сарын 13-ны өдөр барив. Итгэмжлэх жуух бичгээ барих ёслолын ажиллагаанд Ирландын Ерөнхийлөгчийн Ерөнхий нарийн бичгийн даргын орлогч Конор Рагхалайх, ГХЯ-ны Ерөнхий нарийн бичгийн дарга Ниаль Бургесс зэрэг албаны хүмүүс байлцав.
Ирланд Улсын Ерөнхийлөгчтэй уулзах үеэрээ Элчин сайд Н.Тулга хоёр орны харилцаа, хамтын ажиллагааг өргөжүүлэх, ялангуяа улс төрийн салбар дахь найрсаг харилцаан дээр тулгуурлан худалдаа, эдийн засаг, бизнес, соёл, боловсрол, шинжлэх ухаан зэрэг салбарт хамтын ажиллагааг хөгжүүлэх бүрэн боломжтойг тэмдэглэв.
Ирландын Ерөнхийлөгч хоёр орны харилцаа, хамтын ажиллагаа өргөжин хөгжиж байгаад сэтгэл ханамжтай байгаагаа илэрхийлээд Элчин сайдад үүрэгт ажлаа хэрэгжүүлэхэд нь бүх талын туслалцааг үзүүлэн ажиллах болохоо нотлов.
Элчин сайд Н.Тулга энэ оны 4 дүгээр сарын 17-ны өдөр Лондон хотноо зохион байгуулагдсан “Emerging Europe & Central Asia” хурлын Монголын хэсэгт оролцож, Монгол Улсын эдийн засгийн өнөөгийн байдал, Эрдэнэс Тавантолгойн IPO-г олон улсын хөрөнгийн зах зээлд гаргах талаар мэдээлэл өгөв.
Мөн тэрээр хурлыг тохиолдуулан зохион байгуулсан Лондонгийн хөрөнгийн биржийн өдрийн арилжааг нээх ёслолын ажиллагаанд тус биржийн гүйцэтгэх захирал Никхил Рати, Сербийн Сангийн сайд Синиса Мали, Британийн Сангийн дэд сайд Роберт Жэнрик нарын хамт оролцлоо.
Европ болон Төв Азийн бүс нутгийн эрчимтэй хөгжиж буй орнуудын өнөөгийн зах зээлийн орчин, тэр дотроо хөрөнгө оруулалтын урсгал, өсөлтийн таамаг, хөрөнгийн зах зээлд гарах гэсэн үндсэн сэдвийн хүрээнд панел хэлэлцүүлэг хэлбэрээр явагдсан уг хуралд 400 гаруй олон улсын банк, санхүүгийн байгууллагууд, хөрөнгө оруулагчид оролцсон байна.
Элчин сайд Н.Тулга Лондон хотноо энэ оны 11 дүгээр сарын 23-ны өдөр зохион байгуулагдсан MINEX Eurasia уул уурхай, хөрөнгө оруулалтын форумд оролцож, Монгол Улсын эдийн засаг, улс уурхайн салбарын өнөөгийн байдлын талаар үг хэлэв.
Тэрээр үгэндээ, 2016 онд 1.2 хувьтай байсан Монгол Улсын эдийн засгийн өсөлт 2018 оны 3 дугаар улиралд 6.4 хувьд хүрснийг тэмдэглээд, гадаад орнууд, хөрөнгө оруулагчдын өмнө хүлээсэн төлбөрийн үүргүүдийг амжилттай гүйцэтгэснээр Олон улсын зээлжих зэрэглэл тогтоогч агентлагууд манай улсын зээлжих зэрэглэлийг эерэгээр дүгнэсэн, олон улсын зээлжих зэрэглэл тогтоогч “Стандарт энд Пүүрс” агентлагаас Монгол Улсын зээлжих зэрэглэлийг B- төлвөөс B тогтвортой болгон нэмэгдүүлээд байгааг дурьдан Монгол Улсын хөрөнгө оруулалтын орчин улам таатай болж байгааг тэмдэглэв.
Улмаар тэрээр байгалийн арвин нөөцтэй манай оронд хөрөнгө оруулалт хийж, хамтран ажиллахыг хөрөнгө оруулагчдад хандан уриалав.
Мөн уг форумд Уул уурхай, хүнд үйлдвэрийн яам болон “Эрдэнэс Тавантолгой” ХК-ийн төлөөлөл оролцож, “Тавантолгой төсөл” болон “ЭТТ” ХК-ийн хийхээр төлөвлөж буй IPO-гийн бэлтгэл ажлын талаар танилцуулга хийв.
Британи дахь Монголчуудын холбооны санаачилгаар анх зохион байгуулагдсан “Оюунлаг оршихуй” цуврал уулзалтын 46 дугаар уулзалт ярилцлага 2018 оны 11 дүгээр сарын 11-ний өдөр ЭСЯ дээр зохион байгуулагдав. Энэ удаагийн уулзалт ярилцлагад “Жавзандамба хутагт” төвийн багш, гавж Д.Нямсамбуу оролцож, Буддын шашны үнэт зүйл, ёс суртахуун, бясалгалын онолын талаар яриа хийв. Уулзалтад Британид оршин суугаа 50 гаруй монгол иргэд оролцож, бясалгалын онолын суурь, шүтэн барилдлагын учир утгын талаар мэдээлэл авлаа.